Politiit tuluit arsaattarfianni ajunaarnersuarmut pisuutinneqartut
Liverpoolimik illersuisut 96-it Sheffieldimi timersortarfimmi ulikkaavilluni inulimmi taamani ukiut 28-it matuma siorna kiggigussaallutik toqutaapput.
Taamanikkut isiginnaariarsimavaat tuluit FA Cupianni Sheffield Wednesday aamma Liverpoolip unamminerat.
1989-imi isiginnaariat aalakkuttut politiit taamani pisuutikkaluarpaat - taama nassuiaateqarneq toqusut ilaqutaasa Liverpoolimiorpassuillu akerlilersortuaannarsimavaat.
- Aalajangerpunga inuit arfinillit pillaasarnermut inatsimmik unioqqutitsisimasutut unnerluutiginissaannut naammattunik uppernarsaatissaqarlunga, unnerluussisuutitaasoq Sue Hemming oqarpoq.
Politiofficer David Duckenfield taamani politiofficeriuvoq ullorlu taanna ajunaarnersuaqarmat politiit Hillsboroughimi sulinerannut akisussaasuulluni. Taanna mianersuaalliornikkut angutinik, arnanik meeqqanillu 96-inik toqutsisimasutut unnerluutigineqarpoq.
Unnerluutigineqartut allat tallimat tassaapput politiit arsaattarfimmilu isumannaallisaasoq.
Taakku unnerluutigineqarput naapertuuttumik eqqartuussinissamik pinaveersaartitsiniarsimasutut, sillimaniarnermut malittarisassanik malinnissimanngitsutut, aammalu pisortani sulinerminnik paarsinerlussimasutut.
