København: Politiit toqutsisoqarneranik suliamut atatillugu takunnissimasunik ujarlertut

Københavnimi Politiit aggustip aallaqqaataani persuttaannermut, kalaallip angutip 38-nik ukiullip Københavnip ilaani Amagerimi angummik toqutsisimasutut pasineqarluni tigusarineqarneranik kinguneqartumut takunnissimasunik suli ujarlerput.
Assi © : Rigspolitiet
Allattoq Karsten Sommer
aggustip 15-at 2018 10:23
Nutserisoq Simon Uldum

Angut 38-nik ukiulik aggustip 29-ata tungaanut tigummigallarneqarpoq. Taanna toqutsinermut pinngitsuunerarpoq persuttaasimallunili nassuerutigalugu, Ritzau taama allaaserisaqarpoq.

- Inunnilli persuttaannermut polenimiup angutip 43-nik ukiullip toqutaaneranik kinguneqartumut takunnissimasunit saaffigineqarnissarput suli kissaatigaarput, paasiniaanermi aqutsisoq Københavnip Politiivineersoq, Carsten Ahrends KNR-imut oqarpoq.

Christianshavnip ungasinngisaani Christmas Møller Pladsip eqqaani tatsimi angut toqungasoq aggustip aallaqqaataani ullaakkut nassaarineqarpoq.

AAMMA ATUARUK 38-nik ukiulik Københavnimi toqutsisutut pasineqartoq

Paasiniaanermi aqutsisoq naapertorlugu inuit atornerluisuusut sumiiffimmi katersuuttarput politiillu toqutsineq tassani pisimassangatippaat.

- Assortuuttoqarsimarpasippoq tamannalu persuttaannermik kinguneqarsimalluni, angullu toqutaasoq niaqqumigut ajoqusersimavoq toqqutigisaminik, paasiniaanermi aqutsisoq oqarpoq.

Københavnimili politiit takunnissimasinnaasunik ilungersorlutik suli saaffiginneqqusiuarsinnarput.

- Takusaqarsimasut oqarasuaammut 114-imut sianersinnaapput, politiineersoq Carsten Ahrends KNR-imut oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq