Politiit toqusoqarnerarlugu salloqittarneqartut
Nuummi politiit sapaatip akunnerata naanerani imaannaanngitsumik salloqittarneqarput.
Arfininngormat ualikkut pingasut-qeqqata missaani angut Nuummi nalunaaruteqarpoq angummik toqungasumik nassaarsimalluni. Angutip nammineq atini taavaa, toqusimanerakkanili aqqatigut taanagu. Nalunaaruteqartoq telefonikkut isertortumik normulikkut sianerpoq. Oqaluttuarpoq angut toqungasoq uummarsaraluarsimallugu iluatsitsinanili, aammalu politiit takkutinnginneranni qimaajumasimalluni.
Politiit inunnik nalunaarsuiffik ikiortigalugu angutip toqusimanerakkap najugaa nassaaraat kingornatigullu erniinnarluinnaq ambulance politiillu tuaviinnaq angutip najugaanut ornigussimapput, politiit allanik najoqqutassaqanngimmata.
Angutip toqusimanerakkap matu nammineerluni ammarpaa, soorunalimi tupaallaqaluni ambulance politiillu taama uivertigimmata. Sianersimanngilaq – telefoneqanngilarmi.
Politiassistent Poul Hansen Nuummi politiineersoq oqaluttuarpoq politiit maanna Tele attaveqarfigigaat tassanilu paasiniarneqassalluni kina sianersimanersoq tamatumalu kingorna angut nassaarineqarumaartoq salloqittaallunilu nalunaaruteqarsimasutut unnerluutigineqarluni.
