Politiit suliaat imaannaanngitsut

Nuummi politiit sapaatip akunnerata naanerani suliassaaleqisimanngeqaat.
Allattoq Elisa Isaksen
juunip 09-at 2008 17:17

Nuuk 090608K unnuk kbh eis

Tallimanngornermi unnuakkut politiit nalunaarfigineqarput, meeqqat marluk ataatsimik pingasunillu ukiullit Nuussuarmi angajoqqaaminnit qimanneqarsimasut, tassa meeqqap aappaa atisaqarani aqqusinermiittoq naammattoorneqarsimammat. Meeqqat maanna inunnik isumaginnittunit ikiorneqarput.

Arfininngornermi ualikkut illuaqqamik Aqissersiorfimmiittumik ikuallatsitsisoqartoq nalunaarutigineqarpoq. Illuaraq taanna qanittukkut aserorteriffigineqartutut juunip aappaani piginnittuanit politiinut nalunaarutigineqarpoq. Illuaraq nunguilluni ikuallappoq, politiillu inuit ataasinngornermi juunip aappaanniit arfininngornermut juunip arfineq aappaannut Aqissersiorfimmiissimasut imaluunniitt Aqissersiorfimmiittunik takusaqarsimasut attaveqarfigerusuppaat.

Sapaammi ualikkut nakuusernerit arlallit, toqutsinissamik sioorasaarineq aamma kiffaanngissusermik arsaarneqarneq nalunaarutigineqarput. Niviarsiaraq 16-inik ukiulik angummit 35-nik ukiulimmit angutaatigisimasaminit arlaleriarluni nakuuserfigineqarsimavoq. Angutip niviarsiaraq toqunniarlugu sioorasaarsimavaa pinngitsaalillugulu anitsaaliorsimallugu. Angut politiinit tigusarineqarpoq, inatsillu tunngaviusoq naapertorlugu killisiorneqassalluni.