Politiit siorna ulapaarsimapput

Politiit siorna ulapaarsimapput, aammali ukiunut siuliinut sanilliugu ulapinnerunatik. Politiit 2005-mut kisitsisaataat naapertorlugit taama takussutissartaqarpoq.

2005-mimi pinerliisimanerit ukiunut siuliinut sanilliullugit allannguuteqarpallaanngillat, pinerliinerillu ataasiakkaat eqqarsaatigalugit aamma allannguuteqarpallaaratik.

Pinerliinerit sakkortuut eqqarsaatigalugit annikitsumik allannguuteqartoqarpoq, soorlu toqutsinerit eqqarsaatigalugit 2005-mimi arfineq pingasoriarluni toqutsisoqarsimagami, 2004-mi tallimaallutik. Kisitsisilli ukiunut siuliinut sanilliutissagaanni amerlassusaat allannguuteqarpianngillat. 2003-mi arfineq marlunnik toqutsisoqarpoq, 2002-milu siornatut arfineq pingasuullutik.

Pinngitsaaliinerit pinngitsaaleeriarnerillu 2004-mut sanilliullugit amerlerialaarsimapput, ukiunulli siuliinut assersuutissagaanni ikinnerupput.

Tillinniarnerit aserorterinerillu allannguuteqarpallaanngillat, ikiaroornartumillu atuinerit aamma taamaaginnarlutik.

Pinerliinerni malunnartumik allannguuteqartut tassaapput paragraph 16-ni malillugu unnerluutiginninnerit, tassa pisortanik atorfilinnut innimiilliornerit. Siorna unnerluutigineqartut 87-iusimapput 2004-mut sanilliullugu 65-iusimallutik. Qaffariarneq Nuummi malunnarnerusimavoq. Tassunga peqqutaavoq Nuummi politiit unnuami eqqissiviilliornernut sakkortuumik periaaseqarsimammata, taassumalu nassatarisimavaa politiit sulineranni akornusersorneqartarnerannut, ilaatigut puujaasanik milloorneqartarlutik.

-Nassuiaatissanut taanna ilaavoq, taannaannaagunanngilarli. Pisortanut ataqqinninneq ukiuni qulini kingullerni annikilliartortoq malunnarpoq, soorlu nunani allani aamma taamaattoqartoq, taakkulu kisitsisinut sunniuteqarput, vicepolitimester Bjørn Bay oqarpoq.