Politiit saqquminerusariaqarsorai

januaarip 11-at 2005 10:49

Nuummi borgmesterip Siumumeersup, Agnethe Davidsenip illoqarfiup qeqqani politiit

saqquminerusariaqarsorai, taamaalillutik ikiaroornartumik tuniniaasut politiinit ingalasimatinneqarsinnaassammata.

- Illoqarfiup qeqqani taama ammatigisumik ikiaroornartumik tuniniaasoqartuarnera soorunami tujorminartuuvoq.

Inatsisit malillugit ikiaroornartumik tuniniaaneq inerteqqutaavoq, taamaattumillu politiit pisussaapput akuliutissallutik. Isumaga malillugu politiit illoqarfiup qeqqani ersinnerusariaqaraluarput, taamaalillutik ikiaroornartumik tuniniaaneq ingalassimatissinnaagaluaramikku.

Borgmester Agnethe Davidsenip aamma oqaatigaa, ikiaroornartumik tikisitsisarneq umiarsuit aamma eqqarsaatigalugit misissuiffigineqarnerusariaqartoq.

Kiisalu atuarfinni imigassaq ikiaroornartorlu pillugit atuarfinni paasisitsiniaasarnerit maannamut ingerlanneqartut ingerlaavartariaqartut, borgmesteri oqarpoq.