Politiit sapaatip-akunnerata naanerani takussaanerussapput

Præsident Emmanuel Macron Nuummut sapaatiuppat tikissaaq. Taamaattumillu Nuummi politiit ulluni tulliuttuni takussaanerussapput.

Kalaallit Nunaanni Politiit Facebookimi pingasunngornermi ualikkut taama allapput.

Politiit ikiuukkiartortuusut Nuummi innuttaasut naammattoorsinnaasaat nunami politeeqarfinnit allaninngaanneersuusut politiit allapput, ikiorneqarnerullu siunertaraa sapaatiuppat tikeraartoqarnerata ‘eqqissisimasumik torersumillu ingerlanissaanik qulakkeerinninnissaq, taamaalilluta tamatta – tikeraat maanilu najugaqartut – toqqissisimaniassagatta’.

- Taamaammat suleqativut naapikkussigit ilassikutsoorusukkussigit, politiit naalagaasa tullersortaat Kunuk Frederiksen oqarpoq.

Sillimaniarneq pilersaarutiniittoq

Danskit ministeriunerat Mette Frederiksen tikeraarnerup nalaani peqataassaaq. Emmanuel Macronip Mette Frederiksenillu naalakkersuisut siulittaasuat Jens Frederik Nielsen aamma ataatsimeeqatigissavaat, ilaatigut Atlantikup Avannaani Issittumilu sillimaniarneq oqaluuserineqassalluni.

Tamatuma saniatigut aningaasaqarnikkut ineriartorneq silallu pissusiata allanngoriartornera oqaluuserissavaat. 

Tikeraarneq pillugu pisortatigoortumik nalunaarutit annertunngillat, Macronilli sapaatiuppat aallaqqinnissaa qularnanngilaq, aammalu Jens Frederik Nielsen Mette Frederiksenilu atasinngorpat marlunngorpallu Savalimmiuni ataatsimiinnissapput, sillimaniarneq tassani aamma oqaluuserineqassalluni.