Politiit sapaatip akunnerata naanerani amerlanerussasut
Politiit aqqusinermi sapaatip akunnerata naanerani nalinginnaasumit takussaanerussasut, pigaartut pisortaata, Jørgen Madsenip oqaatigaa.
Tamanna sapaatip akunnerata naanissaata akissarsiffiunissaanik akileraarutiniillu utertoortoqarneranik aamma Nuuk Food Festivalertoqarnernissaanik pissuteqarpoq.
- Ataatsikkoortunik pisoqartillugu suliassaqarnerusarluta nalaatikulavarput, taamaammat amerlanerusunik politeeqartussanngortipparput, Jørgen Madsen oqarpoq.
Politiit illoqarfiit pingaarnersaanni unnukkut nakkutilliisut pingasuusaraluarput, sapaatilli akunnerata naanerani matumani sisamaassasut, pigaartut pisortaata oqaatigaa.
Sineriammi aamma amerlanerussapput. Politiit sapaatip akunnerata naanera tamaat takussaanerussapput.
Akissarsiffik akileraarutiniillu utertoorfik tallimanngorneq ulapinnermik aallartikkaat, politiit nalunaaruteqarput. Nunatsinni tamarmi imigassartortoqarnera pissutigalugu tallimanngornerup unnuaani aqqusinermi eqqissiviilliortitsisoqarlunilu angerlarsimaffimmi eqqissiviilliortitsisoqarpoq.
