Politiit saassussinermut takunnissimasinnaasunik ujaasipput

Arfininngornerup unnuaani Nuummi marloriarluni annertuumik persuttaasoqarpoq. Katersortarfiup eqqaani saassusineq nalunaaquttap akunnialunnik qaangiuttoq, angut 34-nik ukiulik Saviminilerinermut ilinniarfiup eqqaani Ilivinnguani nalunaaqutaq arfernup eqqaani,angutinit minnerpaamik marluusunit saassunneqarpoq.
Allattoq Gedion Storch
oktobarip 03-at 2011 14:59

34-nik ukiulik Saviminilerinermut Ilinniarfik eqqaqqullugu ingerlatilluni ajanneqarluni uppisinneqarpoq tamatumalu kingorna kiinnamigut isimmissartilluni.

Sassussisup aappaa 180-185 cm. missaanni angissuseqassangatineqarpoq, kalaaliulluni naatsunik nujaqartoq.  

Arfininngornerup ullaavani nalunaaqutaq arfernup missaani pisumut takunnissisimasinnaasut politiinit ujartorneqarput.

Aammattaaq politiit angut 25-nik ukiulik danskiusoq unnuap ingerlanerani Nuummi Katersortarfiup eqqaani saassunneqarnermini ujajarneqarsimasoq apersoqqissinnaasimavaat.

Taanna katersortarfiup tunuatungaani majuartarfiit aappalartut eqqaanni inunnit sisamanit saassunneqarpoq isummissarneqarluni annertuumik akornutissarsissutigissaminik.

Saassunneqartup ullumi  saassussisut ilaat inuusunnerusoq, unatarneqarnermini imminerminnut tigumminnittoq pillugu politiinut annertunerusumik oqaluttuarsinnaasimavoq.

Angut pineqartoq 17-19-nit missaannik ukioqassangatinneqarpoq, 170-180 cm. missaani  angissuseqarluni, qaatiguua qaqortuuvoq nasartalik, kamiit qaqortut Nike-isut kiisalu nasaq teqqialik qorsuk/qaqortoq aamma Nike-mik nalunaaaqutalik atorpaa.

Taamaattumik atugalimmik ilisarisimannittoqaruni taakku Nuummi politiinut saaffiginneqquneqarput - oqarasuaat 32 14 48-mut sianernikkut - aamma Savilminilerinermik Ilinniarfiup eqqaani saassussinermut takunneratarsimasinnaasut ilanngullugit.