Qummoroortartunik tillinniarneq Politiit qummoroortartut 800 kiilut suli nassaarinngikkaat

Qummoroortartut 1,5 tonsiusut Nuup ilaanit Qinngorpumit decembarip 28-ani pingasunngornermi tillinneqarput. Tillinneqartut affaat suli amigaatigalugit politiit nalunaaruteqarput.
Allattoq Kenneth Elkjær
januaarip 03-at 2017 15:32
Nutserisoq Connie Fontain

Qummoroortartunik containerimit tillinniartoqarneranit sapaatip akunninngoriilerpoq, Nuummili katersortarfiup qummoroortartuutaanit 800 kiilut suli nassaassaanngillat.

Politiit qummoroortartut 700 kiilut illoqarfiup ilaani Nuussuarmi inissiat arlariit eqqaanni decembarip 29-ani sisamanngornermi nassaaraat, inuit marluk tillinniaqataasimanertik pillugu ukiortaanngitsoq tigusarineqarput sulilu tigummineqarlutik, taakkuli saniatigut allanik nutaanik paasissutissarsisimanatik, piareersimasut pisortaat, Brian Thomsen oqarpoq.

Qummoroortartut sinneri 800 kiiluusut illoqarfimmi pingaarnerpaamiinnissaat taassuma ilimagaa.

- Nassiussassatut nassiunniarunikkit immersuisussaapput ulorianartuummatalu illoqarfimmiit nassiunnissaat ajornarpoq, Brian oqarpoq.

Takorloorsinnaaviuk illoqarfimmiit namminerisamik angallammik aallarunneqarsimasinnaaneri?

- Soorunami taamaattoqarsinnaavoq ilimaginngilarali, Brian Thomsen oqarpoq.

Suliaq politiit misissueqqissaartarfiata immikkoortortaqarfianut tunniunneqarsimasoq, Brian Thomsen paasissutissiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq