Politiit: Pisiniarfinni tillinniartartut ajornartorsiutaaqaat

Pisiniarfinni Kamimmik taaguuteqartuni Brugsenimilu ukioq manna tillitat nalingi 3,5 millionit koruunit pallippaat, pisiniarfiutillillu politiinik isornartorsiuipput, politiit sulinerminni pisiniarfinni tillinniartarnerit pingaartippallaanngikkaat ilaatigut oqaatigalugu. Politiilli ima akipput:

- Suliassatut allatuulli pingaartipparput. Pimoorussillutalu qaqugukkulluunniit ingerlatsiniarsarisarpugut. Innuttaasunimmi sullissinissamik pisussaaffeqarpugut. Pisiniarfiugaluarpata inuinnaagaluarpataluunniit assigiimmik sullissiniarsarisarpugut, Nuummi politiineersoq Poul Petersen oqarpoq.

Pisiniarfinni tillinniaqattaartartut politiinit immikkut nakkutigineqarsinnaanissaat pisiniarfiutilllit aamma ujartorpaat, pinerluttulerinermi inatsit naapertorlugu taamaaliorsinnaanertik oqaatigalugu.

Tillinnialli ulorianartuunngimmata immikkut nakkutigineqarsinnaanngitsut, vicepolitikommissærip Niels Nyvangip oqaatigaa, pisiniarfiutillit tillinniat iseqqusaajunnaartiinnarsinnaagaat oqaatigalugu.

Tillinnialli politiinit immikkut nakkutigineqarnissaat imaaliallaannarlugu piviusunngorsinnaanngitsoq, Poul Petersenip Nuup politiivineersup oqaatigaa:

- Periarfissaqanngilagut, inatsisinit aamma aqunneqaratta. Politeeqarfimmi apersuinissatsinnut, misissuinissatsinnullu periarfissaqarpugut, uppernarsineqarsinnaassappallu pineqaatissiisinnaalluta. Tassa akiliisitsisinnaavugut, tillitat nalingisa marloriaataannik akiliisitsisinnaalluta. Aningaasat taakku naalagaaffimmut nakkartussaapput.

Suliat ataatsimut katersorniartarpagut, naliliillutalu. Tillinniamiit tillinniamut naliliisoqartarpoq, qanorlu tillinniakulatiginera aamma isiginiarneqartarluni, Nuup politiivineersoq Poul Petersen oqarpoq.

Pisiniarfinni tillinniarnerit nuna tamakkerlugu maannamut katillugit 605-it ukioq manna nalunaarutigineqareerput.