Politiit: Periuseq nalinginnaasoq malinneqarpoq

Timi ikuallagaasimasoq ilaqutaasunit allaqqaammut tammaaneqartoq anmarkimilu ilisaasimasoq kingorna paasineqartoq pillugu suliami politiit kukkusumik iliuuseqarsimannginerarput.
Allattoq Jens Thorin
oktobarip 07-at 2011 12:12

Ilaqutaasut nunatsinniittut toqusup timaa sumiinnersoq qaammaterpassuarni paasineq ajuleqqavaat.

Kisianni politiit illisimatsitsipput, qanigisaasumik attaveqarsimallutik, taamaammallu isumaqarsimallutik, ilaqutaasut sinneri aamma kalerrinneqarsimasut. Politiillu allanik, ilisinissamik isumaginnikkusuttunik, tusagaqannginnamik, periutsitik malippaat - tassalu timip ikuallakkap ilisaanissaa isumagalugu.

Københavnimi Politiit Amagerimi immikkoortortaanni sulisup, politiassistent Holger Lisbyp, Siverth Petersenip toquneranut tunngatillugu Radioaviisimit suna paaserusunneqarnersoq naluaa.

Soorlu politiit nalunaarusiaanni atuarsinnaagaa, suliaq pisariusimanngilaq pasinartumik pisoqarsimanani.

Taava marlunngormalli Radioaviisip akuliuffigisaani pisimasut oqaluttuaraavut. Tamatumunngalu ima oqarpoq.

- Tassa pissutaasimassaaq, qanigisaanut Kalaallit Nunaanniittunut, ilisinissamik isumaginnisinnaasunut, attaveqarfiginnissinnaasinanngitsugut, Politiassistent Holger Lisby oqarpoq.

Taanna oqarpoq, politiit qanigisaasumik ataatsimik oqaloqateqarsimasut, taannalu ilisinissamik isumaginnikkumasimanngitsoq:

- Tassalu imaappoq, ilaqutaasoq taama qanitsigisoq kalerrinneqarsimappat, taannalu oqarsimappat, ilisinissamut akuujumanani, taava allatut iliorsinnaarpianngilagut, taamaallaat pisortat isumagisaannik Danmarkimi ilisaatitsilluta, Holger Lisby oqarpoq nangillunilu:

- Maani Danmarkimiit kikkut qanigisaasuunersut paasiniarlugu sianeqattaarsinnaanngilagut. Taamaammat isumaqarpugut, suliassarput naammassisimallugu, tassalu qaniginerpaasaani ataaseq kalerrillugu, politiassistenti oqarpoq.

Tassalu taanna isumaqarpoq, qanigisaasoq attaveqarfigisimasamik, ilaqutariit sinneri nammineerluni attaveqarfigisimasariaqaraluarai, taamaalillutik taakkua politiinut saaffiginninniassammata.

- Taava taakkua ilivermik ikiorsimassagaluarpagut, Holger Lisby oqarpoq.

Taamali pisoqanngimmat, politiit Københavnip Kommuniani pisortat isumagisaannik ilisinermik suliaqartartunut suliaq ingerlateqqippaat.