Politiit peqqusigaangamik naalattaqqupput

marsip 22-at 2007 17:23

Paamiuni politiit ippassaq unnukkut aggersarneqarput – aallaasersortoqarmanngooq – aallaasersortoqarnera inuppaaluit alapernaaserpaat.

Inuit alapernaasertut politiit qimagutsikkusuppaat, tassami igalaaniit angut eqqarmat – torlulaartaatillu atorlugit inuit illuaqqullugit qinnuigigaluarpaat, iluaqutaanngilarli, inuit nikinngimmata.

Taama pisoqartarnera takornartaanngitsoq, vicepolitiinspektør Viggo Johansen oqarpoq:

- Uani pisoqarfimmi isiginnaartut persinniarneqarsimapput aallaqqaammut iluatsilluanngitsumik, Viggo Johansen oqarpoq, nangillunilu:

- Taama pisoqartillugu arlalinnik siunertaqartarpugut, tassa uagut nammineq navialinnginnissarput, minnerunngitsumillu isiginnaartut navialinnginnissaat siunertarisaratsigu.

Politiit peeqqusigaangamik, tamannalu malinneqanngippat, ajorluinnartumik pisoqarsinnaavoq – tassa isiginnaartunk ajoqusingaatsiartoqarsinnaammat.

Politiit taama misigisaqakkajuttarnersut aperigatsinni, Viggo Johansen akivoq, tamanna ajoraluartumik takullattaartaritsik, tassa isiginnaartunik peeqqusigaluarlutik naalanneqarnatik, Viggo Johansen oqarpoq.

- Politiinit peertinniarneqaraanni inassutiginarpoq ingerlaannaq malinneqartarnissaa, malinngikkaanni kingunipiloqartarsinnaammat, vicepoliinspektør Viggo Johansen naggasiivoq.

Paamiuni ippassaq aallaasersorneq alianartumik kinguneqarpoq, tassa aallaasersortoq imminut toqummat – inunnik allanik ajoqusertoqanngilaq.