VIDEO Politiit peqqinnissaqarfik isumaginnittoqarfillu imminut toquttarneq pillugu suleqatiserigaat
- Amerlanerpaartaat politiinit orniguffisarpagut nukippassuillu atorlugit pinaveersaartinniartarlutigit, vicepolitiinspektør Viggo Johansen KNR-imut taama oqarpoq.
Pinaveersaartitsineq politiit isumagisussaanngikkaluarpaat, inatsisimmi malillugit akisussaaffik peqqinnissaqarfiup isumaginnittoqarfiullu ataaniimmat. Taamaammat sammisaq ilungersunartoq pillugu oqallittoqarnissaanik kajumissaaruteqarpoq.
- Inatsisiliorneq qiviarutsigu, peqqinnissaqarfik assigiinngitsunik akisussaaffeqarpoq, nappaatinut anniaatinullu tunngassuteqartunik. Tamatuma saniatigut aamma isumaginninnermut tunngasortaqarpoq. Isumaqarpunga sullissiviit taakku marluk kiap suut akisussaaffiginerai oqaloqatigiissutigisariaqaraat, vicepolitiinspektøri taama oqarpoq.
Aamma atuaruk Amerlasuut toqunissartik toqqartarpaat
Politiit pinaveersaartitsinermut atorneqakulasarparput, naak tamanna akisussaaffiginngikkaluaraat.
- Kisitsiserpassuit pisortanut ingerlateqqittarpagut. Uatsinnut inuiaqatigiinnullu iluaqutaassappat pinaveersaartitsinermik suliaqarneq soorunami peqataaffigerusupparput, taamatummi suliaqareeratta. Aamma kisitsisit (imminut toquttartut amerlassusaat, aaqq.) appartinniarnissaat peqataaffigissallugu soqutigivarput.
146-imut sianerit
Nikallungaguit Paarisap nuna tamakkerlugu oqarasuaatikkut siunnersuiffianut Attavimmut sianersinnaavutit, normoraa 146. Imaluunniit meeqqaat oqarasuaataannut 134-imut sianerlutit oqaloqateqarsinnaavutit.