Politiit peqatigiiffiat: Ilinniarsimanerput suusupagaat

Nunatta politiivini qullersatut ilinniarneq naalagaaffiup politiivisa pisortaannit suusupagineqartoq, Kalaallit Nunaanni Politiit peqatigiiffianni siulittaasoq Aqqaluk Petersen oqarpoq.

Qullersatut ilinniarneq, nunatsinni ingerlanneqareersimasoq, politiinspektørinngornissamik periarfissiisarpoq. Tamannali politiinspektørinngortitsisinnaanngitsoq naalagaaffiup politiivini pisortaq Torsten Hesselbjerg oqarpoq. Danmarkimi ilinniaqqaarluni politiinspektørinngortoqarsinnaavoq.

- Tamanna pissutigalugu ilinniarluarsimasut annaasinnaavagut, Aqqaluk Petersen oqarpoq:

- Malitsigisinnaasai ukuupput: Politiitut ilinniarluarsimasut annaassavagut, allatullu ajornartumik piffissami sivisunerusumi sivikinnerusumiluunniit avataaninngaanniit pissarsiniartariaqartassasugut, ilinniartitsineq aqqutigalugu inuttaliinissatta tungaanut, Aqqaluk Petersen oqarpoq.

Aqqaluk Petersenip oqaatigaattaaq politiit nalikippallaartutut imminnut nalilerlutik atorfimminnik qimatsisarsimanissaat annilaanngatigigini:

- Isumaga malillugu, immaqa, taamatut misigisimassasut oqaatigaara. Naak ilinniarlureeraluarlutik qaavatigut naleqanngitsutut isigineqarluni aalajangerneq pissutaaqataasoq politiit pineqartut allanik misilittagaqarusulernerannut, Aqqaluk Petersen oqarpoq.

Sulisunut politikki pitsaanerusoq, aningaasarsiagissaarneq kiisalu amerlarnerusunik sulisoqalerneq politiit ulluinnarni sulinerannut iluaqutaaginnassasut, anguniarneqartariaqartullu politiit peqatigiiffiannit aamma oqaatigineqarpoq.

Taanna oqarportaaq politiitut atorfillit najugaqavissut pingasut sulinngiffeqarnissamik qinnuteqarsimasut.