Politiit paasiniaasartoqatigiivi Moriusaliassapput

Angutip 32-nik ukiullip Moriusarmiup, ataasinngormat ullaakkut aallaallugu toqutaaneranut atatillugu, politiinit oqaatigineqarpoq, Politiit paasiniaasartoqatigiivineersunik marlunnik ullumi Pituffimmut tikittoqartoq.
Allattoq Elisa Isaksen
juulip 15-at 2009 15:19

- Angut 31-nik ukiulik, qanorpiaq pisoqarneranik suli paasineqanngitsumik 32-nik ukiulimmik aallaannittoq, eqqartuussivimmi ullumi ulluni 14-ini tigummigallagassanngortitaasoq, Søren Martin Jensenip politiineersup oqaatigaa, ilanngullugulu ilisimatitsissutigalugu aallaasersortoqarneranut atatillugu qanoq pisoqarsimaneranik politiit pasitsaassaqartut, taamaattorli qanorpiaq pisoqarsimanera politiit paasiniaasartoqatigiivineersunit misissoqqissaarneqassasoq.

31-nik ukiulik tigummigallarneqartoq maanna Pituffimmi isertitsivimmiikkallarpoq, piaartumilli pinerluuteqarsimasunut inissiisarfiit ilaannut sinerissamiittumut nuunneqassalluni.

- Politiit paasiniaasartoqatigiivineersut periarfissaq siulleq atorlugu Moriusaliassapput, ullunilu tulliuttuni ilisimannittunik apersuissallutik. Taakkua kalaallimik suleqateqarput, taamaalilluni apersuinerit kalaallisut ingerlanneqarsinnaaniassammata, Søren Martin Jensen Radioaviisimut oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq