Politiit: nuutsisisarfiunngilagut
Piaartumik ikiorneqarnissamik pisariaqartitsisoqartillugu qitiusumik saaffiginnittarfimmik, alarmcentralimik, pilersitsoqarnissaa politiinit sulisussaqartinneqanngitsoq, Bjørn Bayip aamma oqaatigaa.
Qitiusumik saaffiginnittarfimmik pilersitsisoqartuuppat tamanna inuiaqatigiiinnut iluaqutaasinnaasoq politimesterip qularutiginngilaa.
Kisianni sulisussanik amigaateqarneq aningaasartuutillu tassunga atorneqartussat eqqarsaatigalugit, isuma suli pisiusorsiortuunngitsoq Bjørn Bayip oqaatigaa.
Ajutoortoqartillugu aamma ikuallattoqartillugu inuttaasut sumut saaffiginissallutik ilikkarsimavaat, Bjør Bay oqarpoq.
Taamakkaluartoq qatserisartunik imaluunniit ambulancenik atorfissaqartitsisunit politiit akulikitsunik saaffigineqartarput.
- Taamatut pisoqaraangat saaffiginnittut sapinngisarput tamaat atorlugu ikiorniartarpagut, erseqqissaatigissavarpullu saaffiginittoqarnerit nalaanni allanik ulapputeqarsinnaagatta, Bjørn Bay oqarpoq
Politiinut saaffiginnittarfissap Kalaallit Nunaannut tamarmut atuuttussap pilersinneqarnissaa maannakut suliniutigineqartoq, politimesterip Bjørn Bayip oqaluttuaraa. Saaffiginnittarfissaq politiit suliaannut tunngasunik suliaqartassaaq, illoqarfinnilu ataasiakkaani politeeqarfiit matoqqaneranni ulloq unnuarlu ammasassalluni, Bjørn Bay oqarpoq.
Nuna tamakkerlugu politiinut saaffiginnittarfissaq ukiup ingerlanerani ammarneqassaaq.