Politiit: Nunatta ilaani biilit aqagumiit quaannaveequserneqarsinnaapput

Nunatta ilaani biilit aqagumiit quaannaveequserneqarsinnaalissasut politiit aalajangerpaat.
Biilit quaannaveeqqutilernissaat inatsisit malillugit pisussaaffiunngilaq. Assi © : Merete Lindstrøm, KNR
Allattoq Bibi Nathansen
septembarip 23-at 2020 19:09

Aqquserngit quasappata nunap ilaani biilit aqagumiit quaannaveequserneqarsinnaapput. Kommunini teknikkikkut aqutsisoqarfiit oqaloqatigereerlugit Nunatsinni politiit taama aalajangiipput.

Kommuneqarfik Sermersuumi Tasiilami, Ittoqqortoormiinilu atuuppoq, Nuummili Paamiunilu atuunnanni.

Aamma Kommune Kujallermi innuttaasut biilitik suli quaannaveeqqutileqqusaanngilaat. Politiit tusagassiuutinut taama nalunaaruteqarput.

Sumiiffiit suli akuersissuteqarfiunngitsut quaannaveeqquteqarsinnaalernissamut periarfissaqalernissaat eqqarsaatigalugu politiit kommuninilu teknikkikkut aqutsiveqarfiit silamut ilimasaarutinut malinnaapput.

Biilit quaannaveeqqutilernissaat inatsisit malillugit pisussaaffiunngilaq. Aqquserngilli quasarpallaaleraangata politiit quaannaveeqqutiliinissaq kaammattuutigisarpaat.

Assakaasulli quaannaveeqqutit maajip aallaqqaataatinnagu peerneqarnissaat inatsisit malillugit pisussaaffiuvoq.