Politiit nunatsinni arfineq-marloriarlutik maleruagassanik unioqqutitsisimapput
Politiinut nunatsinni sulisunut maleruagassanik unioqqutitsisimasutut arfineq-marloriarluni siorna suliarinnittoqarpoq. Naalagaaffiup politiivisa nalunaarusiaanni tamanna atuarneqarsinnaavoq.
Nunatta politimesteriata, Steen Thomsenip, kalaallit politiivisa maleruagassanik unioqqutitsisarsimanerat uggoraa.
- Soorunami isumaqarpunga politiit nunatsinneersut maleruagassanik unioqqutitsisassanngitsut, oqaatigissavarali pisinnaasarput tamaat atorlugu nunatsinni atorfillit inatsisit naapertorlugit iliuuseqartassasut, Steen Thomsen oqarpoq.
Suliassat siorna katillugit 87-iusimapput, taakkunanngalu arfineq-marluk nunatsinneersuusimallutik.
Kisitsisit siornameersut ukioq 2004-mut naleqqiutissagaanni appariaateqarput, suliassat taamani aqqaneq-marluusimammata.
Taamakkaluartoq politimesteri Steen Thomsen isumaqarpoq, kalaallit politiivi maleruagassanik unioqqutitsisimasut qallunaat politiivisa unioqqutitsisimasut amerlassusaannut naleqqiullutik allaanerungaanngitsut.
Suliani arfineq-marluusuni sisamat pineqaatissiinermik kinguneqarput, suliaq ataaseq politimesterimit taamaatiinnarneqarpoq suliarlumi naalagaaffiup politiivinit aamma unitsiinnarneqarluni. Politeeq pineqartoq suliffimminit tunuartinneqanngilaq. Suliaq ataaseq alla suli ingerlavoq.
Politiit ilaat pinngitsaaliisimasutut unnerluunneqarsimagaluarpoq, pisulli nalunaarutigineqarnissaata tungaanut piffissaq sivitsortoorsimammat politiip pineqartup suliffimminit tunuartinneqarnissaa politimesterip piumasarisimanngilaa.
Pineqaatissiinerit ilaat tassaavoq naalagaaffiup politiivinit avoqqaarliuteqarneq. Politiit ilaat arlaleriarluni perulluliorsimasutut naalagaaffiup politiivinit avoqqaarlerneqarpoq.