Politiit "Maaji Peqqissuutiguk"-mi misileraatitsipput
Politiitut sulissagaanni timikkut nukittunissaq aamma qasujaatsuunissaq pingaaruteqarpoq. Politinngorniaraannilu pinngitsoorani timip pisinnaasassaasa minnerpaaffissai anguneqartariaqarput. Kikkulluunniit soqutiginnittut maajip ingerlanerani politiitut piginnaasassanik misileraatinneqarput.
- Angutit nerfallarlutik 50 kilonik arnallu 30 kilonik sapinngisaminnik amerlanerpaanik kivittaaritinneqarput. Arpannermik akunnilertarlugu pallorlutik taliminnik niuminnillu siaarsisaqattaarput kinguninngualu "bommi" qulaallugu pisseriarlutik kinguninngua ataaqquttaaritinneqarput, Finn Vigsø, Politiinngorniarfimmi Nuummiittumi ilinniartitsisoq oqarpoq.
- maajip 18-iani inuit 25-t peqataariarlutik, ippassaq pingasunngornermi 28-it peqataapput. Ulluni taakkunani misileraanermi uniinnartoq ataasiinnaasarpoq, politiinngorniarlunilu angusissagaanni pisinnaasassanik angusaqartut marluusarlutik. Piffissaq atugaat kuarterimiit nalunaaquttap akunnerata affaanik sivisussuseqarpoq, Finn Vigsø oqarpoq.
Peqataasuni ikinnerpaamik pingajorarterutaat arnaapput.
- Misigisimavugut misileraatitsinivut alutorineqartut, politiinngorniarnermi aamma suut aqqusaarneqartarnersut taamaalilluta ilisaritippagut, kingulliugunanngilaq peqataanerput, Finn Vigsø naggasiivoq.
Politiinngorniat ukioq kingulleq ilinniartuusut arfineq-pingasut unnunnik misileraaffinnik aaqqissuisuupput.
Ilulissat
Ilulissani politiit "Maaji Peqqissuutiguk"-mut pingajussaa peqataapput. Pingasunngornikkut arpaqatigiittarnitik nangiinnarlugit innuttaasut takisuumut arpannermut aamma iligiiaarluni arpalluni sukkaniunnernut maajimi ilaseraat.
- Arpatsitsinigut tamarmik peqataaffiulluarput, ikinnerpaagamik 30-upput, ataqatigiissaarisoq politeeq Abia Ottosen KNR-imut oqarpoq.
Meeqqanik peqataasoqaraanga arpannermi isorartussuseq affaannanngortittarpaat.
- Aaqqissueqataanitsigut politiit isigineqarnerat pitsanngorteriartittarparput. Pinerluttulerisutuinnaanngitsoq inuppalaartutulli isigineqalertarpugut, Abia Ottosen nassuiaavoq.
Ilulissani politiit maaji naaleraluartut timmisartoqarfiup tungaanut arpatsitsisarnitik iligiiaarlunilu arpatsitsisarnitik pingasunngornikkut pisartut ingerlatiinnassavaat.
