Politiit: Littauer unnerluutigineqassanngilaq

Karen Littauer Qaanaami meeqqap aatagisaata ajuallatsitsisimasutut unnerluutigimmagu Kalaallit Nunaanni Politiit siorna misissuilerput.

Littauerip unnerluutigisassanngortinneqarneranut pissutaavoq naalungiarsuk meningitisertoq aataminit nakorsiunneqartoq danskit aviisiinut oqaluttuaralugu oqarsimammat meeqqap angajoqqaavi aalakoorlutik napasinnaanngimmata aataasup nakorsiussimagaa. Qaanaarlu inukeqimmat ilaqutariillu ilisarineqarsinnaammata, aataasup ajuallatsitsinertut unnerluutigaa.

Karen Littauer Orto Ignatiussen suleqatigalugu siorna qaammatit pingasut, Red Barnetip isersimaartarfiutaani meeqqat inuusuttullu pillugit suliaqarpoq. Littauer Danmarkimut angerlarami meeqqat sumiginnagaasut tusagassiuutitigut oqaluttuarai, ilaatigut Qaanaami imigassap matuneqarneranik kinguneqartumik. Littauerip angajoqqaat apereqqaarnagit meeqqat videokkut immiuttarsimavai meeqqallu angajoqqaamik imigassartortarnerannik apersortarsimallugit. Taakkuli nikanarsaasimasutut unnerluussutiginiakkat politiit ukioq ataasinngoriallartoq malersornianngilaat.