Politiit Kristian Jørgensenimik ujaasinertik unitsippaat

Paamiuni politiit 59-inik ukiulimmik Kristian Jørgensenimik ujaasinertik maanna taamaatiinnarpaat, taanna Allumersat eqqaannut aavariaqataatilluni ujaarineqalerpoq. Ujaasineq taamaatiinnarneqarpoq, politiit sapaatip akunnerata naanerani Air Greenlandip aamma sinerissamik nakkutilliisut qulimiguuliutaannik sukumiisumik ujaaasereersullu inuillu tamaaniittut ujaaseqataareersullu.
Allattoq Elisa Isaksen
aggustip 24-at 2009 07:06

Aavariaqataa 49-nik ukiulik Heine Petersen ajunngitsoq arfininngormat nassaarineqarpoq. Taanna oqaluttuarpoq Kristian Jørgensenilu sapaatip akunnerisa marlussuit matuma siornali aavariarlutik aallaramilli, ullut aqqanillit matuma siornagut imminut attaveerussimallutik. Kangerluup Allumersat ilaani tammaarniarlutik unissimapput. Umiatsiaarartilli avalattaaserniartillugu saavittoorutigisimallugu.

59-inik ukiulik Kristian Jørgensen isigiarsuttuuvoq, nissumigullu suliaritereernermi kingornagut pisunniarnini ajornartorsiutigalugu. Taamaattumik aavaqatigiit isumaqatigiissimapput Heine Petersen kangerluup tungaanut ikiortissarsiussasoq. Ullut pingasut qaangiummata tammaarsimaarfimmut anngussimmavoq, Qeqertarsuatsiaaniillu aavariap arfininngormat naammattoorpaa. Tamatuma kingorna tarrarsuuteeraq ikiorsiullugu qulimiguulimmit Kangilinnguani Sakkutooqarfimmeersumit takuneqarput.

Tamatuma kingornagut politiit sukumiinerusumik ujaasineq aallartippaat. Kinguneqanngitsumilli. Nuna pineqartoq eqqaalu ujaasiffigeqqissaarneqaraluarpoq, ilaatigut pisummik megafonilerluni igittarlunilu ujaasioaqaraluarluni. Taamaattumik ujaasineq ippassaq unnukkut arfernup eqqaani taamaatiinnarneqartoq Paamiuni politiit nalunaarutigaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq