Politiit Kongevejimi assersugaq annertusivaat
Nunatsinni politiit tusagassiortunik Nuummi politeeqarfiup silataani arfininngornermi ullup qeqqata siorna naapitsipput, tassanilu Nunatsinni politiit qullersaqarfiata allaffiani pisortaq Lars Kirkegaard oqaluttuarpoq, politiit Nuummi Kongevevejimi assersuiffiusumik annertusilerisut.
- Tamaani suli assersuivugut, assersuiffigisarpullu maannakkut annertusileruttorparput. Tassa naliliigatta annertusilerinissarput pisariaqartoq, Lars Kirkegaard oqarpoq.
Kisianni assersugartik sooq annertusilernerlugu itinerusumik oqaluttarisinnaanngilaa, oqaatigiinnarlugu isumannaatsuunissamik peqquteqartoq.
- Pisut allanngoraannavipput, uagullu iluarsiiniarsarivugut. Taamaammat isumannaatsuunissaq sapinngisamik pitsaanerpaamik qulakkeerniarlugu assersuiffigisarput annertusivarput.
Lars Kirkegaard siorasaarut pillugu annerusumik oqaaseqarumanngilaq.
- Taakani pisut pillugit immikkuualuttukkaanik oqaluttuarsinnaanngilagut, pisut iluarsiniarnerisa oqaseqannginnissarput pisariaqartimmagu, Lars Kirkegaard oqarpoq.
Assersugaasut maanna tassaalerpoq Jens Kreutzmannip Aqqusernata Aqqusinersuullu naapiffiat, Jagtvejimiit Dronning Ingridsvejimut, Aqqusinersuup Qatserisullu naapiffiat taavalu Kongevejip Ceresvejillu naapiffiat.
Allaffiup pisortaata aamma oqatigaa, Nuummit politiit sinerissami allaniit Danmarkimiillu politiinit maanna ikiorneqartut.
- Sulisoqarnerput eqqarsaatigalugu, taakkua sinerissamit allaniit ilaartuleruttorpavut. Ippassarli unnukkut tikerarput aamma Danmarkimeersunik sinerissamillu allaniit allanik ullumi aamma tikittoqassaaq. Pisut nalilersuinnavippagut, pisariaqarmallu Nsinerissami allaniit Danmarkimiillu sulisunit ikiortissarsivugut, Lars Kirkegaard oqarpoq.
Aamma taama pisoqarnerani Nuummi innuttaasut pissusilersornerat nersualaarpaa.
- Manna iluatsillugu Nuummi innuttaasut nersorusuppavut, assersuinerput politiillu innersuussutaat ataqqimmatigit. Taamaaliornerat nuannaarutigeqaarput. Meeqqat ataasiakkaat assersuinermik ataqqinninngillat, taakkualu angajoqqaavi qinnuigaagut meeqqaminnut iliuuseqaqqullugit, Lars Kirkegaard oqarpoq.
