Politiit Kalaallit Nunaanni LSD nassaarineqartoq pillugu: Ukiuni tallimani aappassaanik nassaarput
Politiit nunatsinni aappaassaanik LSD-mik nassaarput. Siullermeerlutik 2015-mi nassaarsimapput.
Aanngajaarniut allakkanut nipitittakkatut iluseqarluni nunatsinnut eqqunneqarsimavoq. Tassa kipparissuaqqat pappiliaaqqatut nipitittakkatut isikkullit, allallit, qalipaatillit smiley-tallit.
Politiit maannakkut pasitsaassaqarnerlutik oqaatigerusunngikkallarpaat.
Kisianni:
- Misissuinermi nassaarineqarput. Nassaarnerit tamarmik (2015-mi ukioq mannalu) Nuummi pipput. politiit KMNR-imut oqarput. Oqarsinnaanngilagut illoqarfinni allani LSD inuusuttut akornanni misilittarneqanngitsoq, politiit KNR-imut oqarput.
LSD
LSD uanngaanniit naalisagaavoq Lyserg-Syre-Diethylamid.
Kemiskinit pinngortinneqartarpoq sakkortuumik aanngajaartitsisartoq. Aamma taaneqartarpoq "syre".
LSD kuseriarnertut, iisartakkatut pappialaaqqatullu - "allakkanut nipitittakkatut" tuniniarneqartarpoq.
Annikitsuaqqamilluunniit atuinermi atuisup malugisaatai - annikitsumik annertuumilluunniit sunnerneqartarput.
Ilaannikkut atuisimanerup kingunerisaanik pissutsit piviusut qimanneqarsinnaasarput. Taanna taaneqartarpoq "trip".
LSD sakkortuumik tarnikkut napparsimalersinnaanermut qanillitaasarpoq soorlu annilaangarujussuartarnerit kiisalu psykose-rneq. Piviusunut pissutsinut annertuumik saneqquttunik takorluuititsisinnaavoq, imminut toqunnermik kinguneqartumik ajunaarnerilluunniit assersuutigalugu inuk timmisinnaasorilersimaguni .
Nunatsinnut aanngajaarniutinik sakkortuunik eqqussineq qaqutigoortuuvoq. Ukiuni kingullerni politiit ecstasy-nik mkokain-inillu annertunngitsunik nassaartarsimapput.
Nunatsinnut aanngajaarniutinik sakkortuunik eqqussinerit ikittut pisarsimapput. Qaqutigoorput annikittarsimapput nammineq atugassatut eqqussaallutik, politiini pisortap tullia, Viggo Johansen oqarpoq.
Inuusuttut tarnikkut napparsimalersimallutik napparsimavimmi uninngasut
Inuusuttut Nuummi Dronning Ingrid Napparsimavissuanut aanngajaarniuummik atuereernerup kingunerisaanik tarnimikkut napparsimalersimallutik unissimapput.
Taamaammat politiit angajoqqaanut meeqqanullu akisussaasunut kaammattuipput, aanngajaarniutit sakkortuut atornerisa ulorianassusaa pillugu inuusuttut eqqartueqatigeqqullugit.
- Qanittumi assersuutinik takuvugut inuusuttut LSD-mik atuisimanerup kingunerissanik tarnikkut ajoqusersimanertik pillugu napparsimavimmut unittariaqarsimasut ikiortariaqarlutik. LSD-mik atuineq inuunermik kinguneqarsinnaavoq, taama ilisimatitsivoq Kalaallit Nunaanni Poiliini pisortap tullia, Viggo Johansen.
