Politiit ittuat: Tasiilami imigassat kimittuut matuneqarlit!

Tasiilami sapaatip-akunnerata naanerini kingullerni imminut toqoriarnerit qulit sinneqartut ilungersunarluinnartutut isigalugit, naalakkersuisoqarfiit susassaqartut tamaasa Naalakkersuisut siulittaasuannit Hans Enoksenimit ullumi ataatsimiigiaqquneqarput.
Allattoq Louise M. Kleemann
juunip 10-at 2008 11:40

Suleqatigiissitamik Namminersornerullutik Oqartussat ataaniittussamik pilersitsisoqarnissaa Naalakkersuisut siulittaasuata piaartumik pissasoq aamma kissaatigaa.

Tasiilami politiit ittuat Kristian Sinngertaat aperaarput tamanna qanoq isumaqarfigineraa.

- Assorsuaq nuannerpoq tusarlugu Naakallersuisut tungaanniit iliuuseqartoqarnialernera.

Qanoq iluaqutaassasoraagit?

- Apeqqutaasorujussuussooq qanoq iliorniarnersut, kommunit sulisui taakkulu

isumaqatigiissagaluarpata assorsuaq nuannissagaluarpoq. Assersuutigalugu Illoqqortoormiuni imigassap kimittuup matuneratigut ajornartorsiutit annertoorujussuit qimanneqarput. Taamaattumik siunnersuutigissagaluarpara imigassat kimittuut tamaani matuneqarnissaat.

Imigassat kimittuut matuneqarpata tamatuma inunnit arlalinnit akerlerineqariataarnissaa naatsorsuutigineqarsinnaannginnersoq Kristian Sinngertaat aperaarput:

- Ilumoorpoq. Aamma Illoqqoortoormiuni imigassat kimittuut matuneqarmata akerliusoqarpoq. Maannakkulli taamatut matusisimaneq qujassutigaat, Kristian Sinngertaat oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq