Aasaannaqaaq, meeqqat aasaanerani atuanngiffeqalivipput taamatuttaaq inuppassuit aasaanerani sulinngiffeqalivillutik.
Aasaanerani nalunaaqutit ilagaat imaatigut angalasarnerit, qujanartumillu amerlaqisut isumannaallisaanissamik eqqarsartarput – aammali ilaqarput, ajoraluartumik soqanngivissunngikkunik annikitsuinnarmilluunnit isumannaallisarsimasunik.
Aallartinnani suut eqqaamasassaanersut pillugit politimestereqarfimmi vicepolitikommissær Kristoffer Petersen aperaarput, imalu akivoq:
- Iputit aallannginnermi pigineqartariaqarput, taamatuttaaq ajunaalernermi kalerrisaarutit, puttaqutit kiisalu VHF-radio pigissallugit pingaaruteqarput. Arlaatigut ajutuussagaluaraanni Aasiaat Radioa attavigineqarsinnaavoq.
Oqarasuaatit angallattakkat ajunngikkaluartut sumiinneq apeqqutaatillugu tigusisinnaanerat killeqartarmat Kristoffer Petersenip eqqaamaqquaa.
- Matumani GPS pigissallugu pitsaavoq, sumiinnerluni nalugaanni GPS-ip takutissinnaavaa. Kristoffer Petersen oqarpoq.
Aamma orsussaqarluarnissaq aallannginnermilu tankip salilluarsimanissaa pisariaqarput. Umiatsiap naleqquttumik motooreqartinnissaa pingaaruteqarluinnarportaaq.
- Sukkalisaarneq inuit ilaasa nuannarisarpaat taamaattumillu umiatsiaaqqatik angivallaamik motoorilertarpaat. Umiatsiaararsigaanni motoorip sakkortunerpaaffissaa allaqqasarpoq. Angivallaamik motooriliisarneq nalinginnaavallaaqaaq. Kristoffer Petersen nassuiaavoq.
Ujaasisarnerit ukiut kingulliit eqqarsaatigalugit nikerarpallaanngillat, siorna ujaasinerit 114-simallutik.