Politiit innuttaasunut ikioqqupput
Nuummi arfininngormat ullaassakkut sakkortuumik saassussisoqarpoq. Tamanna Kongevejimi Eurosparip Brugseneeqqallu akornanni nal. 04.00-p missaani pivoq. Arnaq saassunneqarpoq taskimiittuutiminillu tillinniarfigitilluni.
Allattoq Peter Troelsen
februaarip 03-at 2014 07:28
Arnaq illoqarfimmit angerlartilluni tunuminit ajanneqarluni orlutinneqarpoq. Angutip ajassisup paarisimavaa allallu taskia imaarsimallugu. Saassussisut sisamaasut 400 kr.-it oqarasuaallu angallattagaq tillissinnarlugit qimaasimapput.
Saassussisup qanoq isikkoqarneranik politiit ilisimasaat ikittuinnaapput.
Angut kalaaleq qaqortumik qasertumillu qalipaatilimmik kipparissumillu allalimmik kavaajalik. Angutip angissusaa qanorlu ukioqarnera ilisimaneqanngilaq. Arnap saassusseqataasut pingasut sivikitsuinnarmik takusimariaramigit qanoq isikkoqarnersut takusinnaasimanngilaa, vicepolitikommissær Knud Frederiksen Nuup Politiivineersoq taama paasissutissiivoq. Nuummi Politiit oqarasuaatikkut 70 14 48-kkut attavigineqarsinnaapput.
