Politiit immap ulinnissaa anorlernissaalu neriuuteqarfigaat

Innaarsuit eqqaanni iluliarsuaq ikkarleqqasoq avannaap tungaanut illikaamisimavoq. Taamaalilluni nunaqarfiup talittarfianut ungasilliimisimalluni.

Unnugulu immap ulinnera kujasimmillu anoraasuarnissaa iluliarsuamut avalatsitsissasoq Politiit neriuutigaat.

Politiit tusagassiuutinut oqaaseqartartuat Karl Sværd KNR-imut taama paasissutissiivoq.

- Kujasimmit anoraasuartarnissaa silasiortut ilimasaarutigaat, ullumilu naliginnaasumik ulinnerusussaalluni, oqarpoq.

Innarsunni iluliarsuaq aserussagaluarpat malissuarnit anguneqariaannaat isumannaarniarlugit Avannaata Kommuniani upalunaarsimasut killilersuipput. Innuttaasut 33-t illuminnit allamut nuutsinneqarallarput, nunaqarfiillu qaninnerit nerisassanik tapersersuissallutik.

AAMMA ATUARUK Innaarsunni iluliap malissuaartitsisinnaanera ernumanartoq

Innaarsunni pisiniarfik aamma matuneqarpoq killigititaasup iluaniimmat, innuttaasulli nerisassaqarnissaat isumannaarneqaqqullugu ullumi nalunaaqutaq ataatsiniit marluk tungaanut ammatinneqassaalluni.

Issittumi sakkutooqarfiup umiarsuaa Knud Rasmussen Innaarsuit tungaanut ingerlaartoq ullumilu marlup missaani apuutissasoq Karl Sværdip paasissutissiissutigaa.

- Piareersimassaagut arlaannik pisoqariasaarnissaanut, Issittumi Sakkutooqarfiup suliamut akisussaasua Jakob Rousøe oqarpoq.

Timmisartoq sumiiffimmut aamma iluliarsuarmut assilisaariartorluni aallassasoq oqaatigaa. Assit immikkut ilisimasalinnit iluliarsuup qanoq angitigineranut nalilersuinermut atorneqassallutik. SAr-ip qulimiguulia aamma Kangerlussuarmut Ilulissiartinneqarpoq susoqariataassagaluarpat piareersimatinneqarluni.

AAMMA ATUARUK Innaarsuit eqqaanni pisoq qanimut malinnaaffigaarput

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl