Politiit illoqarfinni arlalinni ulapputeqarsimapput
Angut 18-inik ukiulik Aasiannut akunninnermini illumut iseqqusaannginnini kamaatigingaaramiuk aallaammik aallersimavoq, maangaannarlu igilluni. Politiit apuummata angut qimagutereersimavoq, kingornali inissiami allami aallaanni imalik eqqaminut ilillugu sinittoq nassaarineqarluni. Angut tigusarineqarpoq isertitsisarfimmilu unnuisinneqarluni. Siorasaarisimasutullu unneerluunneqassasoq Aasianni politiit ilisimatitsipput.
Kangaatsiami nukappissat pingasut 13-inik 14-inillu ukiullit nunaqarfimmut inuerunnikumut pisuttuartillutik taarsimmat sumiiffeerussimapput. Politiit ujaasinerminni ajunngitsut nassaaraat, maannalu politiit siku nalloriaannaammat sikumi angalanissaq mianersoqqussutigilerpaat.
Aasianni politiit ilanngullugu nalunaarutigaat sapaatip-akunnerata naanerani inuit aalakkussimaqisut angerlarsimaffinnilu eqqissiviilliornerit pisarnermit amerlanerit pisimasut.
Sisimiuni politiit, meeqqat ukiukitsut aalakkuttut ulapputigisimavaat. Niviarsiaraq ataaseq 14-inik ukiulik silami artuleqqasoq siumorneqarsimavoq, assullu timaa nillertissimammat napparsimmaviliaattariaqarsimavoq, maannali ajunngitsoq oqaatigineqarluni.
Annersaaneq ataaseq unnerluussummik kinguneqassanersoq maanna paasinialeruttorpaat.
Maniitsumi angerlarsimaffinni eqqissiviilliortoqaalussimavoq, biilillu ataatsit napparussuarmut aporsimasut inuttaat unnerluussassanngortitaassaaq. Maniitsumili politiit ilisimatitsissutigaat angut aalakoorsimanngitsoq biilernermullu allagartaqarsimasoq.
