Upalungaarsimasut kitaani sineriammi 2017-imi aggustip qaammataani pinngortitami qassiinik ikuallattunut ornigupput.Assi: Isak Lynge Rasmussen

Politiit ikuallattoqallattaarmat mianersoqqusipput: Pinngortitami ikumatitsinissaq mianersuussiuk

Sisimiuni kangerluarsuup qinnguani qatserisartut ataasinngornerup unnuaani qamisaajartortariaqarsimapput, qatserisartullu ippassaq qamisaareerlutik Sisimiunut uternissaat pilersaarutigineqarluni. Nuummilu sapaatit akunneri kingulliit marluk annikitsumik ikuallattoqallattaavoq.

Sisimiuni qatserisartut kangerluup qinnguani pinngortitami ikuallaffisumi qamisaapput, ikuallannerlu kingorna nakkutigineqarsinnaalerluni, Sisimiuni politikommissæri, Karl Jørgen Lennert ilisimatitsivoq.

Politiit oqarnerat naapertorlugu ikuallanneq pujoorivimmit aallartippoq. Pujoorivik nakkutigineqaannavissimagaluarpoq, innerli siaruaammat ikuallannera nunamut panertumut siaruaatipallappoq.

Taamaammat innuttaasut pinngortitamiitsillutik ikumatitsissagunik mianersornissaat politiit qatserisartullu inassutigaat.

- Nuna panertorujussuuvoq. Upernajaarpugut apullu aapiloornikuulluni. Taamaammat sumi tamaani panernersuaqarpoq, Karl Jørgen Lennert oqarpoq.

- Nunap immikkoortuani maani pinngortitami ikuallannerit marluk maannamut nalaappavut. Tamanna tupaallaatiginngilarput, pinngortitarmi panertorujussuuvoq.

Tupakut igalaamerngillu

Nuummi ikuallannerit annikitsut aamma ajornartorsiutigineqarput. Ivikkat naasullu allat tupakunit igalaaminerillu seqinermit kissatsinneqartunit ikummartinneqartarput.

Qatserisartut pinngortitami ikuallattunik tallimat missaanniittunik sapaatit akunneranni kingullerni qamitsiartoreersut, Kommuneqarfik Sermersuumi upalungaarsimasut pisortaat, Knud Petersen naliliivoq.

- Ikuallannerit annersaat sapaatip akunnerata siuliani Nuussuup atuarfiata eqqaani pivoq, upalungaarsimasut pisortaat oqarpoq.

- Ikuallannerit maannamut ajornartorsiutaarujussuanngillat, annertuumilli ikuallattoqalissagaluarpat tamanna ajornartorsiutaalissaaq. Ikuallannera anorlerneranit siaruartipallassinnaavoq. Maannakkut panerujussuarnera nalinginnaavallaanngilaq.

Taamaammat innutaasut ikumatitsinissaminnut mianersornissaat imermullu ungasippallaartumi ikumatitsinnginnissaat taassuma inassutigaa. Sisimiunit, Karl Jørgen Lennert aamma taama inassuteqarpoq.

- Ikumatitsiniarussi tatsip erngulluunniit allap eqqaani ikumatitsigitsi, taamaaliornikkut ikuallattoqaleraluarpat tamanna qamipallanneqarsinnaassaaq. Kangerlunnimi ikuallattoqaleraangat piffissaq sivisunerusoq atorlugu ikiuuttussat takkunniartarput, Karl Jørgen Lennert oqarpoq.

Siallernissaa kissaatigisorujussuugaa

Nuummi upalungaarsimasut pisortaata siallilaalernissaa neriuutigaa.

- Kuuginnartumik siallernissaa kissaatigaara.

Norgemiut silasiorfiat Yr aamma danskit silasiorfiat DMI naapertorlugit ullualuit qaangiuppata aatsaat siallilersinnaavoq. Illoqarfiit pingaarnersaanni sapaatip akunnerata naanerani aatsaat siallissaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat