Politiit: Greenpeacekkut unioqqutitsipput
![](/sites/default/files/styles/image_934x467/public/article_images/morten_nielsen_630.jpg?itok=e1wTp20H)
Greenpeacemimi ilaasortat pinerluttulerinermi inatsit tunngavigalugu pineqaatissinneqarput:
- Inatsisilerineq eqqarsaatigalugu Aviâja Helmsip taama oqarnera eqqortuunngilaq, Morten Nielsen oqarpoq.
Morten Nielsen taama oqarsinnaaguni, taava Greenpeacekkormiut pinerlunniatut taaneqarsinnaasutut isiginerpai?
- Naamik taama oqanngilanga. Oqarpunga Greenpeacekkormiut pinerluttulerinermi inatsit unioqqutimmassuk pineqaatissinneqartut. Greenpeacekkormiut pinerlunniatut taaneqarsinnaanerannut apeqqut allarluinnaavoq, Morten Nielsen oqarpoq annertunerusumillu nassuiaalluni:
- Danmarkimi atuagaatit takoqquunnarsinnaavakka, tassami taakkunani allaaserineqarpoq oqallisaasimaqisoq, suliniaqatigiiffiit pinerluttutut oqaatigineqarsinnaanersut aammalu qaqugukkut pinerluttulerinermi inatsimmik unioqqutitsisarnersut, Morten Nielsen tikkuussivoq.
Demokraatineersup Anda Uldumip Greenpeacekkormiut pinerluttutut taammagit oqallinneq aallartippoq. Anda Uldumip taama oqarnera isumaqatiginagu Aviâja Helmsi oqarpoq, Greenpeacekkormiut pinerlunnermut inatsimmik unioqqutitsisimanngimmata pinerlunniatut taaneqarsinnaanngitsut.
Pinerlunnermut inatsisip Greenpeacekkormiut unioqqutikkaat, Morten Nielsenip oqaatigaa, naqissuserluguli pineqaatissinneqarnerisa kingorna pinerlunniatut taaneqarsinnaaneri ilumoortariaqanngitsuusoq:
- Oqartissinnaanngilarma Greenpeacekkormiut pinerlunniaasut, Morten Nielsen oqarpoq.