Politiit: Anthon ilumoorpoq
- Suliaq aallartikkatsigu hashi pisoqarujussuanngoreersimavoq. Pinerluttoqarsimaneranik paasiniaanerput ingerlatiinnaq aallartipparput, hashimillu toqqorsinermut atatillugu pinerluttoqarsimaneranut ersiutissaqanngilluinnartoq paasiniaanerup qularnarunnaarsippaa, Kalaallit Nunaanni politimesteri Bjørn Tegner Bay oqarpoq.
Taamaasilluni Anthon Frederiksenip politiiunermini qimmini ikiaroornartumik ujarlernissaanut sungiusarnissaa anguniarlugu hashi politiiniit pisimanerarlugu nassuiaateqarnera politimesterip taperserpaa.
- Politikeri pineqartoq ikiaroornartunik ujarlertartumik qimmimut sungiusaasutut politiini ukiut arlallit siornagut sulisimavoq. Taamaattumik qimmiminik sungiusarnissaanik siunertalimmik unioqqutitsinerunngitsumik hashi politiinit tunniunneqarsimavoq. Qimmerlu sungiusanngikkaangagu hashi karsimi aningaaserivimmut ilineqartarpoq. Pineqartullu politikeritut sulilerami qimmimillu sungiusaasuujunnaarami hashi paarisani puiguissimavaa, Bjørn Tegner Bay oqarpoq, ilanngullugulu oqarluni, Anthon Frederiksen puigutusimagaluarluni pinerluttuliorsimanngitsoq.
Aamma atuaruk Naalakkersuisoq qimmini sungiusarniarlugu hashimik toqqorsisimavoq
Anthon Frederiksen politiitut sulinermi nalaani hashi tigusimammagu politiinut attuumassuteqanngitsumut, Politiit pillugit Naammagittaalliuteqartarfimmut suliaq ingerlatinneqaqqaarsimavoq, taakkulu politiit naliliinerat isumaqatigisimavaat.
- Politiit pillugit Naammagittaalliuteqartarfiup pinerluttuliortoqarsimanngitsutut naliliinitsinnut isumaqatigaatigut. Taamaammat suliaq politiinit naammassereersimasutut isigineqarpoq, Kalaallit Nunaanni politimesteri Bjørn Tegner Bay oqarpoq.
