Politiit angummik Nuummi malersuipput
Nutartigaq 16:10
Nuummi ullumi aallaasersortoqarluni pissanganartorsiortoqarpoq.
Umiarsualivimmi igittoqarsimavoq angummillu politiiniit qimaasoqarpoq.
KNR-ip paasisai napertorlugit suliarineqartoq tassaavoq, angut Nuup ilaani Qinngorpumi imminut toqunnissamut ulorianartorsiortittoq. Taanna umiarsualivimmut kingusinnerusukkut qimaavoq, sakkulisarlunilu angallatiminut arpalluni.
KNR-ip tusarfii naapertorlugit politiit angummut igeriarput, umiarsuarlu Narluneq eqqorlugu. Angut eqqorneqarsimanngineragaavoq, angallatiminulli qimaalluni pituutaalu savimminik kipillugit.
Angut umiarsualivimmiit aallarsimasoq takunnittut oqaluttuarput.
Ilaqutaasoq: Angut ajunngilaq
Umiarsualivimmi pingasoriarluni igeriartoqarsimasoq politiit uppernarsarpaat. Aamma Qinngorpumi Suloqqami igeriartoqarsimannginnerarpaat.
KNR-ip angutip ilaqutaata ilaat oqaloqatigaa taassuma angut oqaloqatigisimavaa. Angut imminut ajoqusernissaminik eqqarsaateqarsimannginnerartoq taanna paasissutissiivoq. Eqqissisarniarlunili aallarsimanerarpaa.