Politiit angallataat sukkanerusunik taarserneqassasut

Politiit angallatimik sisamaasunit pingasut tallimanik mikinernik sukkanerusunillu taarserneqarnissaat aalajangerpaat.

Politiit namminneq misissuineri suliassanillu pingaarnersiuineri politiit angallataasa pingasut tallimanik mikinernik sukkanerusunillu taarserneqarnissaannut tunngaviusut, politimesterip Bjørn Tegner Bayip nassuiaatigaa.

- Aallartariaqarnitta amerlanersaanni sukkassuseq pingaarnerpaasarpoq, politimesteri oqarpoq.

Umiatsiaq kivilersoq, sineriammiittut qiulersut imaluunniit nunaqarfinni aallaasersornerit, nakuusernerit kinguaassiutitigulluunniit pinerliinerit assersuutigineqarsinnaapput, politiillu maanna angallataasa sukkassusiat 11 knob naammanngilaq.

- Taamaammat sukkanerpaamik 40 knobip missaanik sukkassusilik eqqartorpagut, taamaalilluni sukkassutsimut tunngatillugu pitsanngoriangaatsiassaaq, taanna oqarpoq.

AAMMA ATUARUK Politiit angallataannik Sisak II-mik angalaqataaneq takuuk

Sukkassusaata saniatigut umiatsiat amerlanerusut nunap immikkoortuinut aamma iluaqutaassapput.

Umiatsiap mikinerusup 20 fodsiusup Tasiilamiinnissaa sinnerilu sisamat Qaqortumi, Nuummi, Sisimiuni Aasiannilu inissisimanissaat pilersaarutaavoq. Angallat pigiinnagassaq aamma Nuummiissaaq. Taannalu suliassanut pilersaarutaareersunut apuunnissamut piffissaqarfiulluartunut atorneqartassalluni.

Politiit maanna angallatigisaat tallimanit arfinilinnut inuttaqartarput 11 knobimillu sukkassuseqarlutik. Angallatit nutaat 25-p aamma 40 fodsip akornanni angissuseqassapput, taavalu ataatsimit marlunnilluunniit inuttaqassallutik.

Politimesterip taassumalu suleqatigiissitaasa umiatsiat qanoq pisinnaasaqarnissaat qanorlu isikkoqassanerat suliarileruttorpaat. Suliallu upernaamut neqerooruteqartitsissutigineqarnissaa neriuutigaa. Pilersaarut malillugu umiatsianit nutaanit siulleq ukioq aappaaa affaq qaangiuppat piariissaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat