Politiit angallataat inuttassaaleqissukkaat
Pineqartoq tassaavoq politiit angallataat Sisak III novembarip aallartilaarneranili inuttassaaleqisoq, taamanikkummi paasinarsivoq angallammi inuttaagaluartut atorfininnissamut piumasaqaatit naammassisimanngikkaat.
Oqaatigineqareersutut arfineq pingasunik inuttaqartussaavoq. Ilaatigut maannamut aquttumik atorfinitsitsisoqarsimanngilaq, aquttunngortussaq aquttutut ilinniarsimasuunermi saniatigut ikuallattumi pujorsiornissamut sungiusarsimasuussaaq aamma kalaallisut oqalussinnaassalluni.
- Qinnuteqarnissamut killigitinneqartoq tassaavoq januaarip 22-at, neriuppugut taassuma kinguninngua atorfinitsitsisinnaajumaarluta, Nunatsinni politiit allaffissornermut pisortaat Claus Rifbjerg Atuagagdliutinut oqarpoq.
Kujataani politiit pisortaata Bent Ole Kleistip oqaatigaa, politiit angallataata novembarip aallartilaarnerani unikkallarnerata kingorna ujaasisoqartariaqarsimanngitsoq.
- Imaanili annaassiniarnissaq pisariaqalissappat, angallatinik namminersortunit pigineqartunik attartornissaq periarfissaajuaannarpoq, taanna erseqqissaavoq, ilanngullugulu oqaatigalugu Issittumi Sakkutooqarfik pisariaqartitsisoqalissagaluarpat ikiuunnissaminut sillimajuartuummat.