Politiit amigaataapput
Kalaallit Nunaanni politiit pisariaqartinneqartut pissarsiarineqarnissaat siunissami unamminartussaasoq, politimester Bjørn Tegner Bay Atuagadliutini apersorneqarluni oqarpoq.
Pineqartut tassaapput politiinngorniat, politiitut ilinniarsimasut Danmarkimeersut inatsisilerituullu.
Tamanna ajornartorsiutitut qaangerneqarsinnaanngitsutut politimesterip taajumanngilaa, qaangerneqarsinnaasorli oqarluni. Inuiaqatigiinni 56.000-iusuni politiinik ilinniarsimasunik sulisussarsiorneq unammillernartuusoq, politimesterip erseqqissarpaa.
Pissutsit eqqarsaatigalugit politiinik annertunerusumik ilinniagaqartitsinissaaq pissusissamisuussaaq.
Nuummi poliitinut ilinniarfimmi politiinngorniartut aqqaneq-marluk ukiumut ilinniartuutigineqalersarput. Politiinngorniarlutik qinnuteqartut kingulliit misilitsimmata, arfineq-marluk kisimik naleqquttutut nalilerneqarlutik ilinnialernissaminnut tigusaapput.
Politiinngorniarluni ilinniarnissamut qinnuteqartut pissuserissaarneq, timikkut peqqissuuneq tarnikkullu ajungitsuunissaaq qulakkeertussaagaat, politimesteri oqarpoq.
Atuagarsorluni misilitsinnermi amerlasuut angusinngitsoortarput.
- Inuiaqatigiinni pissutsit nalinginnaasumik ilisimasariaqartut amigaatigisarpaat, politimester Bjørn Tegner Bay oqarpoq.
