Politiit akiligassiissutaat akilerneqanngitsut: 20 million koruunit

Politiit pillaatitut akiligassiissutaat amerligaluttuinnarput. Ukiut ingerlanerini nunatsinni innuttaasut politiinut akiligassaat amerligaluttuinnarput.

Akiligassallit parnaarussaasinnaanerat periarfissaalersinnaavoq.

Nunatsinni innuttaasut politimestereqarfimmut akiligassaat amerligaluttuinnarput.

Aningaasat millionilikkaat inatsisinik unioqqutitsisartut kaasarfiiniipput, aningaasallu taakkua ukiut tamaasa amerleriartarput.

2001-imi politiinut akiligassat 8,6 million koruuniupput. Taakkua siorna 19,8 million koruuninngorsimapput.

Tamatumunnga atatillugu eqqaaneqassaaq taakkua amerleriaatit ilagimmatigik akiligassiissutit marluk katillugit 6,5 million koruuninik amerlassusillit.

Taamaattorli taakkua ilanngaatigigaanni politiinut akiligassat ukiumut 1 million koruuninik amerleriartarput.

Tamatumunnga politiit akiligassiinermut tappinnerulersimanerat politimester Steen Thomsenip patsisaanerarpaa.

- Ukiut pingasut ingerlaneranni ukiut tamaasa pillaatitut akiligassiissutit amerleriartarput, Steen Thomsen oqarpoq.

Kisianni akiliineq ajortut siunissami iliuuseqarfiginiarneqartut Steen Thomsenip oqaatigaa:

- Oqaluttuarisinnaavara eqqartuussiveqarneq pillugu ataatsimiititaliarsuup isumaliutissiissutaani siunnersuutigineqarmat, akiligassanut taarsiullugu pinerluuteqarsimasunut inissiisarfimmiititassanngortitsisoqarsinnaanera eqqartuussiviup aalajangersinnaalissagaa, tassa akiligassalik akileerusussuseqanngippat.

- Tassa akiligassalik akileerusussuseqanngippat pinerluuteqarsimasunut inissiisarfimmiitinneqarsinnaalernissaa siunnersuutaavoq, Steen Thomsen oqarpoq.

Ukiut tallimat qaangiunnerisigut akiligassat pisoqaavallaalertarput. Aammattaaq akiligassat pillagassaajunnaarsitaanikkut imaluunniit toqusoqarneratigut taamaatiinnarneqarsinnaapput.