Politiit angutit marluk mianersuaalliorluni toqutsisimasutut, umiatsiamik imigassartorsimallutik ingerlatsisimasutut mianersuaalliorlunilu innarliisimasutut tamatuma kingorna unnerluutigaat.Assi: KNR

Politiit ajutoortut pillugit: Inuusuttut 50 knobersornerminni kassumut aporput

Umiatsiaq sapaatip unnuaani ajutoormat arnaq inuusuttoq ajunaarpoq, inuusuttullu allat arfinillit tamatuma kingunerisaanik napparsimmavimmut unillutik.

Umiatsiaq Nuup Kangerluani sapaatip unnuaani ajutoormat arnaq inuusuttoq 20-t sinnerlugit ukiulik ajunaarpoq. Pineqaatissinneqarsimasunut inissiisarfiup Sermitsiallu akornanni ajutoorput.

Umiatsiamik ajutoortut Kalaallit Nunaanni politiit oqarnerat naapertorlugit 50 knobit missaannik sukkatigisumik ingerlaarnerminni kassoq aporpaat. Inuusuttut arfineq-marluk 20- 30-llu akornanni ukiullit umiatsiamiipput. Taakkunannga pingasut immamut igeriussaapput – taakkunannga ataaseq arnaq inuusuttoq ajunaarpoq. 

Puttaqutit akiligassiinerillu
 

  • Umiatsiami, umiatsiaaqqami, umiaasaaqqami,  vandscooterimi il.il. ilaasunut tamanut naammattunik puttaquteqarnissaq inatsisitigut piumasaqaataavoq, aquttullu tamanna akisussaaffigaa.
  • Ilaasunut puttaqutit amigarpata akiligassinneqarnermik kinguneqarsinnaavoq.
  • Tamanna angallatini minnerni puttaquteqarnissamut nalunaarummi normu 848-mi 14. oktobari 1992-imeersumi, nunatsinni aamma atuuttumi, allaqqavoq

- Ajunaartoq puttaquteqarsimanngilaq – tamannalu ajunaarneranut peqqutaasimasinnaavoq, nunatsinni politiit pisortaata tullersortaa Carl Sværd oqarpoq.

Umiatsiarnermi qanoq sukkalisaartigisoqarsinnaaneranik    killissarititaqanngilaq. 

Umiarsualiviit eqqaatigoornermi 3-5 knobersornissaq, najukkani umiarsualiveqarnermut oqartussat aalajangersagaraat.

Inuusuttut ajutoortut tamarmik Dronning Ingridip Napparsimmavissuani unipput – taakkunanngali ataaseq ippassaq marlunngornermi angerlarluni. 

Inuusuttut taakku politiit oqarnerat naapertorlugu aqqunangaatsiarsimapput, navianartorsioratilli. Taakkunannga ataaseq niumigut aqqunarujussuarsimavoq. 

AAMMA ATUARUK Nuup Kangerluani ajunaartoqareersorlu: Inuusuttut arfinillit napparsimmavimmi suli uninngasut

Politiit angutit marluk mianersuaalliorluni toqutsisimasutut, umiatsiamik imigassartorsimallutik ingerlatsisimasutut mianersuaalliorlunilu innarliisimasutut tamatuma kingorna unnerluutigaat. 

Unnerluutigineqartut aaversipput, aavilu misissugassanngorlugit Danmarkimut nassiunneqarput. Unnerluutigineqartut pinngitsuunerarnatillu pisuusutut nassuinngillat. Politiillu ajutoortoqarnerata kingunerisaanik kajumissaaruteqarput: 

- Immami angalaarnissinni mianersortarisi, Carl Sværd oqarpoq. 

Umiatsiami ilaasunut tamanut naammattunik puttaquteqarnissaq inatsisitigut piumasaqaataavoq, aquttullu tamanna akisussaaffigaa. Umiatsianermili puttaquteqarnissaq inatsisitigut piumasaqaataanngilaq. Puttaquteqarnerli isumatusaarnerummat politiit puttaquteqartoqartarnissaa kajumissaarutigaat. 

Inuusuttut umiatsiamik ajutoortut tamarmik puttaquteqarsimanngillat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat