Politiit aallaasilerlutik piareersimatinneqaleraluarput
Politiit immikkut ittumik pisoqartillugu sakkulerlutik pisoqarfimmut ornigutsittagaat, tallimanngormat ualikkut Nuup ilaani Ole Brandtip Aqqutaanut ornigutsinneqarput, angutit fiisterfimmi kamaattut kalerriutigineqarmata.
Allattoq Najaaraq Egede
apriilip 11-at 2011 09:23
Inuit marluk inimit fiisteriusumit qimaasimallutik politiinut oqaluttuarput. Inissiami ineqartoq angut silaarullunni kamattoq oqaatigaat, annilaanngatiginerarlugu angutip aallaasersoratarsinnaanera, peqarmanngooq, Nuummi politiinit Niels Nyvang KNR-imut oqaluttuarpoq.
Politiit pigaartut Nuussuup nutaanngitsortaanut apuukkamik silataanit marsilerpaat, pisullu nalaani politiit sakkulerlutik orniguttartut piareersimatinneqalerput.
Piffissarli sivisunngitsoq qaangiummat ineqartoq nammineq anillappoq politiinillu tigusarineqarluni.
Angut sakkulersorsimannginnerarpoq, oqarlunili pulaartut ilaannit nammineq annersarneqarsimalluni, pisorlu politiinut suliassanngorlugu nalunaarutigalugu.
