Politiit aallaammik sioorasaarneqartut
Takunnittup angut 48-nik ukiulik ingerlaqasiunniarlugu aalajangerpoq. Kinguninngua aqqusinikkut ingerlatillutik angutip 48-nik ukiullip oqarasuaataa sianerpoq, aallaannilu nunamut ileriarlugu oqarasuaat tigummagu ingerlaqataata aallaammik arsaarpaa.
Angutip oqarasuaataa sianersimanngikkaluarpat ajortorujussuarmik pisoqarsimassangaluartoq Qeqertarsuarmi politiit aqutsisuat Steve Berthelsen oqarpoq.
Politiit takkummata angut 48-nik ukiulik aallaammik allamik aallerluni angerlarsimaffimminut utereersimavoq.
Ualeq taanna politiinut pissanganartorsiorfiuvoq. Angut aallaammik sakkulisarluni angerlarsimaffimminiit anisoq politiinit naammattoorneqarpoq.
Angutip tunniutiinnaqqulluni oqarfigineqarami politiit aallamminik ummiummagit politiit inuunertik annaanniarlugu biilit tunuannut qimaasariaqarsimapput.
Angut sioorasaarinermi kingorna illuminut qimaalluni uterpoq. Piffissaq sivisooq illumini toqqoqqareerluni angut politiinut tunniutiinnarpoq.
Aallaasersornerminut suna peqqutaasimanersoq angutip politiinut nassuiarsinnaasimanngilaa.
Angut maanna ulluni 19-ini politiinit tigummigallagaavoq.
