Politiit 81-nik ukiullip nassuiaanissaa pissangallutik utaqqivaat
Nutaarmiuni pisunik paasissutissat amerlanerit politiit pissarsiarereerpaat.
Danmarkimili pinerluttoqarsimatillugu paasiniaasartut nalunaarusiaat suli utaqqineqarmat angutip 22-nik ukiullip toqutsisimasutut pasisap tigummigallangaanera sapaatit akunnerni sisamani sivitsorneqarnissaa politiit piumasarinialerpaat.
- Danmarkimi pinerluttoqarsimatillugu paasiniaasartut nalunaarusiaat kingulleq utaqqivarput, taakkumi tigoreeriarutsigit suliaq inaarsarlugu aallartissinnaagatsigu.
- Nalunaarusiaq tigoreerutsigu unnerluussaq sukumiisumik apersorneqassaaq, tarnillu pissusaanik ilisimasallit nalunaarusioreerpata unnerluussaasoq qanoq pineqaatissinneqassanersoq nalilersorsinnaanngussavarput.
Politimestereqarfimmi allaffissornermi qullersaq Claus Risbjerg taama oqarpoq.
Angutip 22-nik ukiullip eqqarsartaasia misissorneqarsinnaassanersoq politiit paaserusuppaat, sisamanngorpallu eqqartuussivimmi suliaq sammineqareerpat tamanna paasinarsiumaarpoq.
Angut 32-nik ukiulik Nutaarmiuni aamma toqoriarneqartoq maanna ajunngitsoq, Nutaarmiunullu utereersimasoq Dronning Ingridip Napparsimmavissuani nakorsat qullersaat Carsten Thordalip oqaatigaa. Angut 81-inik ukiulik suli Rigshospitalemiippoq, taannalu kisiartaalluni pisunik oqaluttuarsinnaammat politiit utaqqivaat peqqissilluni oqaluttuarsinnaanngornissaa.