Politiit 25-riarlutik naammaginanngitsuliorsimapput

Politiit silinerannut atatillugu naammagittaalliutit tunniunneqarsimasut 2005-mi 25-iupput. Naalagaaffiup unnerluussisuata ukiumoortumik nalunaarusiaani takkuteqqammisumi taamatut allaqqasoqarpoq.

Politiip ataatsip, suliakkiissutit suliarinagit arkiivimut toqqortiinnartarsimammagit akiliisussatut pineqarpoq. Suliassat toqqorterneqarsimasut katillugit 37-iusimapput, ilaatigut kinguaassiutinik atornerluisoqarneranut atatillugu suliassat, persuttaanerit, siorasaarinerit tillinniarsimanernullu tunngasunut suliat, arlallit nutaanngilillutik toqqoqqaneqarsimapput.

Suliamut tunngatillugu politeeqarfimmi stationlederi 16.000 koruuninik akiliisussanngortinneqarsimasoq, nalunaarusiami allaaserineqarpoq.

Suliassami allami politiassistenti suliassaminik nakkutiginnissimanngitsutut 12.000 koruuninik akiliisussanngortinneqarpoq, mattunneqaqqasoq nakkutigisassaa imminut nivinngarluni imminorsimammat.

Suliami allami politeeq naammagittaalliutigineqartoq arnaq meriatut isikkoqarnerarsimagamiuk, unnerluussummik tunineqanngilaq.

Nalunaarusiami oqaatigineqarpoq, innuttaqassuseq aallaavigalugu, Kalaallit Nunaanni politiit pillugit naammagittaalliutit, Danmarkimut naleqqiullugit amerlanerusartut.

Nunatsinni innuttaasut oqartussaasunik upperinnikkunnaaleriartornerat naammagittaalliortarnerit amerlaneruneranik kinguneqartitsisoq Naalagaaffiup unnerluussisuata, nalunaarusiaani allaqqasoqarpoq.