Politiit: 20-nik ukiulik aalakoortoq meeqqanut umertoq

Ilanngutassiaq politiit oqaaseqaataannik ilallugu tallimanngornermi maajip ulluisa aallaqqaataanni nalunaaqutaq 12.43 nutarterneqarpoq.

Angut 20-nik ukiulik aallaammik tigummiarluni nunaqarfimmi Nanortaliup ungasinngisaaniittumi pisuttoq pillugu Kalaallit Nunaanni Politiit pingasunngormat unnukkut nalunaaqutaq 19:46 sianerfigineqarput.

Angut aalakoorsorineqarpoq meeqqanillu pingasunik sioorasaarisimalluni. Qaqortumit politiit sisamat ornigupput, nunaqarfimmukarnissarli akunnernik marlunnik sivisussuseqarpoq.

Kommunefogedip innuttaasunit ikiorneqarluni angut politiit apuunniarneranni isumagaa.

Politiillu akunnerit marluk qaangiuttut apuukkamik angut tigusaraat, Qaqortumilu politeeqarfiliaallugu.

Angut 20-nik ukiulik aalakoortorujussuugami silattorsarluni sinitsinneqarpoq, ullumilu killisiorneqarluni.

Politiit angutip sioorasaarisimagaluartoq tigummigallarnissaanut pissusissaqarsorinnginnamik angut misissuinerminni iperarpaat.

KNR sooq angut iperagaanersoq pillugu politiinut apeqquteqarniarsarigaluarpoq, iluatsinnaguli.

Politiit KNR-imut tallimanngornermi ima nassuiaateqarput: 

- Nassuiaataagallartut naapertorlugit naak angut meeqqanut aallaammik siorasaarisimagaluartoq politiit angutip tigummigallarneqarnissaanut pissutissaqanngissoraat. Inummik tigummigallagaasoqassatillugu piumasaqaatit assigiinngitsut naammassineqartussaasut politiit nassuiaatigaat. Piumasaqaatit taakku suliami pineqartumi piffissami matumani naammanngitsut unnerluussisussaatitaasup nalilerpaa, taamaammat politiit angut inatsit naapertorlugu killisiorsinnaanngilaat.