Politiinut naammagittaalliutit amerlapput, suliniuteqartoqarporli
DR-ip tusagassiaraa, politikommissæri aamma politiassistenti unnerluutigineqaqqammertut, angut 20-nik ukiulik Qaqortumi isertitsivimmi siorna marsimi toqunera pillugu. Tamannalu politiit pillugit suliassanngortitsinerit arlallit ilagiinnarpaat.
Naalagaaffimmi politiit qullersaqarfiat Rigspolitit nalunaarpoq, maleruagassanik unioqqutitsisimasutut siorna nalunaarsorneqarsimasut 80-it akornanni aqqaneq-marluk politiinut naammagittaalliuutaasimasut. Taamaalilluni agguaqatigiissillugu politiit quliungaangata ataaseq maleruagassanik unioqqutitsisimasutut nalunaarutigineqarsimasarpoq.
Arnamik eqqarsartaatsimigut kingusittumik kinguaassiutitigut atornerluineq, pinngitsaaliineq, kiffaanngissusiiaaneq, kinguassiutitigut aamma meeqqanik atornerluinerit. Isertitsivimmiittumik imminortoqarsimammat politiit atorfimminnik sumiginnaanerat, aalakoorneq pissutigalugu suliartunngitsoorneq, pinerlunnermut tunngasut 43-it politeeqarfiup kiilerianut toqqortat, suliffiup biiliinik sulereernerup kingornagut biilernerlunneq.
Maleruagassanik unioqqutitsisimanerit nalunaarutigineqarsimasut assigiinngeqaat, suliassanngortitallu tamarmik naammassineqarsimanngitsut, ajornartorsiuteqartoqartorlu Nunatsinni politimesteri Anders Linnet nassuerpoq:
- Taama isikkoqarsinnaavoq, kisitsisilli qaffasinnerat eqqummaariffigaarput. Erseqqissaatigissavara ukiut kingulliit eqqarsaatigalugit aatsaat taama amerlatigilersimammata. Anders Linnet oqarpoq.
Maleruagassanilli unioqqutitsinerit taama amerlatiginerannut suna peqqutaava ?
- Tamanna kialuunnit akissutissaqartigunanngilaa. Imaassinnaavoq, kalaallit danskillu oqaluttuarisaanerat kulturiallu assigiinngitsuummata kalaallit nunaanni pinerlunniarnerit akulikinnerusimasut. Ajornartorsiutillu aaqqinniarlugit sulissuteqarpugut. Politimesteri erseqqissaavoq.
Politeeqarfinni ataasiakkaani ataatsimiinnerit aalajangersimasumillu sammisassaqartitsinerit ingerlanneqassapput. Aamma politiit pillugit maalaartarfik attaveqarfigineqareersimasoq, Anders Linnet oqarpoq.
Folketingimi eqqartuussiveqarnermut ataatsimiititaliami ilaasortat arlaleriarlutik nunatsinnut paasiniaajartorlutik tikeraarsimapput, siulittaasuallu SF-imeersoq Anne Baastrup oqarpoq, politiit atugarisaat pitsanngorsaaviginiarlugit politiillu ikiorserneqarnissamik neqeroorfigineqassasut. Kalaallimmi Nunaanni politiiuneq sakkortuujuvoq kiserliornarlunilu.
- Politiit amigaataapput, sulisarnerujussuartik naammagittaalliutigisarpaat, kisimiittaqalutillu. Aamma pisimasunik ilungersunartunik paasiniaatillutik nunaqarfinnut ulluinnarlugu aallarsinnaaneq ajorput, ullormilu sulivallaartarnertik pissutigalugu ulluinnarni inuunertik aqukkuminaatsissinnaasarlugu. Anne Baastrup nassuiaavoq.
Anne Baastrup aamma oqarpoq, sulinermi ilungersunartumik pisoqarsimatillugu politiit oqaloqatissaaleqisartut, tamatumalu kingunerisaanik ulluinnarni inuunerannut sunniuteqartartoq pissusilersuutigisartagaannullu sunniuteqartartoq.
