Politiinut kusanaatsuliortoq parnaarunneqassaaq
Nuummi angut 19-nik ukiulik nunatta eqqartuussiviata qaammatinik qulinguluanik anstaltimi parnaarussassanngorlugu pineqaatissippaa.
Angut 19-nik ukiulik Nuummi imerniartarfiup Diskotek After Darkip silataani immiaaqqap puuanik politiit biilianut milloorsimavoq tukkarlugillu, kusanaatsumillu pissusilersorsimavoq, inunnullu kajumissaarisimalluni politiit sassuteqqullugit kiisalu politiit tigusaarisaannik aniguisitsiniarsimasutut pisuutinneqarpoq. Angut 19-nik ukiulik aamma siusinnerusukkut persuttaasimasutut unnerluutigineqarami taakku pineqaatissiissutigai.
Angut taanna Nuup eqqartuussiviani qaammatit arfinillit anstaltimi paarnaarussassanngorlu eqqartuunneqareerpoq, siusinnerusukkut persutaasimasutut unnerluutigineqarami. Nuup eqqartuussiviani politiinut kusanaatsuliorsimasutut pingitsuutinneqaraluarpoq.
Pingitsuutitaanera tunngavigalugu unnerluussisut nunatta eqqartuussivianut ingerlatitseqqiipput, unnerluussisullu tamatumuuna malugeqquaat angut 19-nik ukiulik inunnut politiinik saassussinissamik kajumissaarilermat, politiit ulorianartorsiortinneqarsimasut.
