Politiinngortut qulingiluat
Angutit arfineq pingasut arnarlu ataaseq tulluusimaaqalutik ilaquttami saavanni politimesterimit Bjørn Tegner Bayimit tallimanngornermi apriilip arfineq pingajuanni Nuummi allagartartaatik tiguaat.
Siunissami suleqatitillu nunatsinni innuttaasut isumannaatsumik toqqissisimasumillu inuuneqarnissaannut suleqataassapput.
- Ilinniarnissi nalaani suleqatsikkuminartuunersi takutissimavarsi, suleqatikkuminartuunerlu pingaaruteqartorujussuuvoq. Ingammik innuttaasunik sullissaqalerussi. Innuttaasut 99 procentii uagutsitulli anguniagaqarput - tassalu Kalaallit Nunaat toqqisisimaffiusinnaasoq, politimester Bjørn Tegner Bay oqarpoq.
Naammassisut amerlanerit politiitut naliginnaasutut atorfinipput, tassa ulloq unnuarlu alapernaarsuineq, arlaannik pinartoqarpat takkukkasuarneq innuttaasunillu angallannermi ajutoortoqartillugu, tillinniartoqarsimatillugu nakuusertoqarsimatilluguluunniit sullissineq.
Nunatsinnilu aallartiffisimaninniit politeeqarfinni allani sulilersinnaallutik.
- Politiinngortut uku qulingiluat inuiaqatigiinni toqqissisimatsitseqataanissaminnut piareersimapput. Uanga isumanni Kalaallit Nunaanni ilinniakkat pitsaanerpaat naammassivaat, taamaattumillu qarasarsorlutillu timitaliisinnaalluarput, Lars Kirkegaard Kalaallit Nunaanni Politiini atorfillit pisortaat oqarpoq.
Politiinngorniarneq modulinut pingasunut agguagaavoq, ilinniartut qaammatit arfineq pingasut atuarfimmi ilinniariarlutik, qaammatini 20-ni nunatsinni politeeqarfiit ilaanni politiitut praktikkerlutik.
Naggataagullu qaammatini arfineq pingasuni atuarfimmi ilinniaqqillutik, timersorlutik atuagarsorlutillu soraarummeertarput imminnut politiitut taasinnaalersinnatik.
