Politiinngorniat misilittarneqaqqaassapput
Politiit ilinniarfiat ukiut tamaasa ilinniartunik qulit 15-illu akornanniittunik ilinniartoqalersarpoq. Atuarfimmiinnerup saniatigut suliffimmik misiliineq Ilulissani, Qaqortumi, Sisimiuni Nuummilu pisarpoq misilitsinnermillu ilinniarneq naggaserneqartarluni.
- Inuusuttut 20-niit 30-it qeqqat tikillugu ukiullit periarfissaqarput politiinngorniarnissamut. Allattagarsornikkut timersornikkullu misilitsittarput tassanilu angusitut atorfininnissamut oqaloqatigiinneq aqqusaaqqaarlugu naliliiffigineqartarput. Taakku saniatigut ilinniartunngorniarlutik qinnuteqartut pinerluuteqarsimanersut misissorneqartarpoq annertuumillu pinerluuteqarsimasut politiinngorsinnaanngillat. Kisianni kukkuluttornerit annikitsut soorlu pisiniarfinni tillinnerit p0litiinngorusuttunut akornusiinissaat ilimanarpallaanngilaq, politiit ilinniarfianni pisortaq Frederik Lundblad oqarpoq.
Politiinngorniarneq qaammatini 36-ni ingerlasarpoq qaammatillu arfineq pingasut siulliit atuagarsornermut atorneqartarput. Tamatuma kingorna qaammatini 20-ni politiitut sulinermik misiliisoqartarpoq tamatumalu kingorna politiit atuarfianni qallunaatut atuartitsiffiusumi ilinniaqqittoqartarpoq. Tassalu politiitut allagartartaarnissamut aqqut ammartarluni.
- Politiinngorniat angusarissaarlutik soraarummeersut suliffissamik neqeroorfigineqarsinnaapput. Kalaallit Nunaanni politiit amigaataapput taamaattumik qallunaanik atorfinittoqartarpoq. Kisianni tassa pitsaanerpaassagaluarpoq politiinik immitsinnut pilersulersinnaasuugutta, maannalu politiinngorusussinnaasunut pilerisaarineq tamatuma tungaanut alloriarneruvoq, Frederik Lundblad KNR.gl-mut oqarpoq.
- Politiinngorniat aallartittussat tullii 2013-mi aggustimi soraarummiissapput. Suliaq kigaassinnaasarpoq misilitsinnerit oqaloqatigiinnerit aammalu Danmarkimi Rigspolitiinit akuerineqarnissaq aqqusaarneqartussaammata. Anguniarneqartarpoq politiinngorniarfimmi aallartinnissaq qaammatinik pingasunik sioqqullugu tigutissimaneranni ilisimatitsinissaq, Frederik Lundblad oqarpoq eqqaasitsissutigalugu qinnuteqarnissamut killigitinneqartoq tassaammat novemberip 30-at 2012.
Politiinngorniarusuttunut pilerisaarinermi plakatit quppersakkallu atuarfinnut atuakkanillu atorniartarfinnut agguaanneqarput. Tassani takussaanngippata politeeqarfiit paasiniaaffigineqarsinnaapput. Takoqqusaarutit aamma KNR-TV-kkut maanna ingerlaalereerput.