Sapaatip-akunnerata naanera sinerissami politiit ulapaarfigisimavaat.
Angut inuusuttoq 16-inik ukiulik Tasiilameersoq savimmik tallimanngormat unnukkut qulingiluat missaanni imminorniarsarisimavoq, politiinillu orniguffigineqarnermi kingorna politiinut qunusaarisimavoq.
Tamanna pissutigalugu atorfilimmik qunusaariniarsimasutut maanna unnerluutigineqassaaq.
Tasiilami politeeqarfiup pisortaa Kristian Síngertât taama ilisimatitsivoq.
Nuummi politiit angutinik inuusuttunik marlunnik arfininngormat ullaassakkut pingasut qaangilaaraa Ukkusissanut qaqisimasunik annaassiniartariaqarsimapput.
Qatserisartut pingasut ikiortigalugit annaassiniartoqarpoq.
17-inik ukiullit Ukkusissat kimmut sammiviata tungaatigut ammukarniarsarisimagaluariarlutik ingerlariaqqiffissaarussimapput, oqarasuaatikkullu angallattakkatigut ikiortissarsiortariaqarsimallutik.
Angutit inuusuttut taakku marluk tallimanngornerup unnukkuani Ukkusissanut qaqisimapput. Qaqqasiornissamut atortunik peqarsimanngillat salasimaqalutillu. Nuummi politeeqarfiup pisortaa Bent Heiselberg taama allappoq.
Annertunerusumik ajoqusertoqanngilaq.
Sinerissami pisut ataatsimut isigissagaanni nunatta sineriassuani politeeqarfiit annertunerusumik pinartumilluunniit suliassaqarsimanngillat.
Inuit aalakkuttut politeeqarfinni ataasiakkaani ulapputigineqarsimapput, eqqissiviilliornerillu orniguffigineqartariaqarsimallutik.
