Politiinit nutaarsiassat

Angut 20-nik ukiulik arnamik 60-inik ukiulimmik pinngitsaaliisimasutut Nuummi, sapaatip akunnerata naanerani tigummigallagassanngortinneqarpoq.

Sinerissami politeeqarfiit paasiniaaffigisatta amerlanersaasa, sapaatip akunnerata naanera eqqissisimaarfigisimavaat.

Nuummili politiit, angut 20-nik ukiulik arnamik 60-inik ukiulimmik pinngitsaaliisimasutut, novemberip sisamaata tungaanut tigimmigallagassanngortitsisimasut, politeeqarfimmiit Lillian Nielsen paasissutissiivoq.

Taassuma saniatigut, aalakoorpallaat qulit, politeeqarfimmi sinitsinneqartariaqarsimapput.

Angerlarsimaffinni eqqissiviilliortut 15-it orninneqarsimapput. Illunullu tillinniarnerit arfineq-pingasut nalunaarutigineqarsimallutik.

Errorsisarfiit ilaanni aserorterisoqarsimavoq, imermik ajoqusiinermik kinguneqartumik.

Paamiuni politiit, inuit marluk umiatsiaaqqamik 15 fodsimik angissusilimmik angalasut, motoriminnik unittoorsimasut ujartariaqarsimavaat.

Radioqarallartillutilli namminneq Qaqortup Radioa attavigisinnaasimagaat, Paamiuni politiinit Johan Barlaj oqaluttuarpoq.

Sapaatip akunnerata naanerani, Sisimiuni Brugsenimi tillinniartoqarnerani, aningaasivik 4.000 koruuninik imalik tillinneqarsimavoq.

Sannaviillu ilaanni tillinniartoqarmat, tillinniat tigusaqarsimanersut suli paasineqanngilaq.

Ittoqqortoormiini politiit, illoqarfiup iluani aallaasersortoqarmat tigusarinnittariaqarsimapput.

Politeeqarfiit sinnerini sapaatip akunnerata naanera eqqisisimaarfiusimavoq.