Politiimik toqutseriartoq eqqartuussaavoq

Angut 44-nik ukiulik Paamiuneersoq ukiuni sisamani pinerluuteqarsimasunut inississarfimmittussanngortinneqarpoq, siorna septemberimi politeeq seqquusarfigereerlugu. Taassuma saniatigut pinerluttuliornernut allanut aamma unnerluunneqarpoq. Taamaasilluni pinerlunnerit tallimat katillugit Nunatta Eqqartuussiviani eqqartuussaassutigai. Paamiut eqqartuussiviata ukioq siusinnerusukkut ukiuni sisamani pinerluuteqarsimasunut inissiisarfimmiittussanngortitaanera taamaasilluni naqissuserneqarpoq.
Allattoq Noah Mølgaard
aggustip 22-at 2012 13:12

Eqqartuunneqartoq siusinnerusukkut politimik toqutsinikuuvoq taannalu pinerluuteqarsimasunut inissiisarfimmiissutigisimallugu. Taanna 1986-mi pivoq taamanikkut 17-nik ukioqarluni politeeq aallaallugu toqukkamiuk. Tamanikkut ukiuni arfinilinni pinerluuteqarsimasunut inissiisarfimmiittussanngortinneqarpoq. Taannali 1986-mili pisimammat maanna eqqartuussaaneranut sunniuteqanngilaq.

- Eqqaamasaqanngilara 18-it inorlugit ukiullip taama sakkortutigisumik pineqaatissinneqarsimaneranik. Taamanikkut Paamiut eqqartuussiviani ukiuni arfineq pingasuni pinerluuteqarsimasunut inissiisarfimmiittusanngortinneqaraluarpoq taannali sakkukillillugu Nunatta Eqqartuussiviata ukiuni arfinilinni inissiisarfimmiittussanngortippaa, unnerluussisuunerugallartoq Rikke Holm Simonsen KNR.gl-mut oqarpoq.

Siorna politeeq aallaasersorfigereerlugu ikuallattoqarneranut kalerrisaarut toorpaa, qatserisartullu takkummata qatserisartut ittuat ummiukkaluarpaa taannali toqqorterasuarpoq. Tamatuma kingorna angut eqqartuussaasoq illoqarfiup ungataanut toqqorpoq politiillu Nuummeersut Paamiunukarlutik angut seqquusarnerup aqaguani tigusaraat. Aamma persuttaasimasutut eqqartuunneqarpoq aappani puiaasami milorsimagamiuk.

- Unnerluussut malillugu angut eqqartuussaatipparput. Ukiuni sisamani pineqaatissinneqarnera sakkortuvoq. Allatut oqaatigalugu politiimik toqutseriarneq sakkortuumik pineqaatissiissutaasarpoq tamannalu iluarisimaarparput. Qujanartumik akuttusoorujussuarmik politiinik toqutseriartoqartarpoq angutillu 44-nik ukiullip eqqartuussaanera pitsaaliuissutaasinnaassaaq taamatut iliornissamut ussernartorsiortunut, Rikke Holm Simonsen oqarpoq.

Angut misiliummik iperagaasinnaavoq pineqaatissinneqarnerup 2/3 delia atoreeruniuk, taamaattoq unnerluussisuunerup tamanna suli eqqarsaatersorfiginngilaa.